Class 9 Boichitramoi Assam Chapter 1 Question Answer in Bodo आह ‘मफोर | Ahom For | Class 9 Boichitramoi Assam Question Answer in Bodo to each Chapter is provided in the list of SCERT, NCERT, SEBA आह ‘मफोर Class 9 बाइदि मैयानि आसाम Chapter 1 Question Answer दिए गए हैं ताकि आप आसानी से विभिन्न अध्यायों के माध्यम से खोज कर सकें और जरूरतों का चयन कर सकें Notes of Class 9 Boichitramoi Assam Chapter 1 Question Answer. Class 9th Boichitramoi Assam Guide, Baidi Mewani assam Class 9 Question Answer. SEBA Bodo Medium Class 9 Boichitramoi Assam Notes Chapter 1 covers all the exercise questions in NCERT, SCERT.
Class 9 Boichitramoi Assam Chapter 1 आह ‘मफोर
Class 9 Boichitramoi Assam Notes Chapter 1 आह ‘मफोर। Boichitramoi Assam Guide for Class 9th Chapter 1. Also Same NCERT Solutions for Class 9 Boichitramoi Assam इस पोस्ट में हम आपको ये समझा ने कि कोशिश की है की Class 9 Boichitramoi Assam Solution Chapter 1. अगर आप एक सात्र या शिक्षाक हो बोडो मीडियम की, तो आपके लिए ये Notes for Class 9 Boichitramoi Assam बोहत लाभदायक हो सकता है। Ncert Boichitramoi Assam Class 9 Chapter 1 मे आप अपना ध्यान लगाके पढ़ कर इस Question Answer of Class 9 Boichitramoi Assam Chapter 1 में अछि Mark ला सकते हो अपनी आनेवाली परीक्षा में।
खोन्दो 1 आह ‘मफोर
Chapter 1 Ahom For
फराबादियै सोंनायनि फिननाय
1. आह ‘मफोरा सिगाङाव मा हारिनि मानसिमोन?
फिन : आह ‘मफोरा गुबैयै टाइ हारिनि मानसिमोन। आसामाव फैनायनि उननिफ्रायसो बिथांमोना आह’म मुङै सिनायजायो।
2. आह ‘मफोरनि गोजाम थाग्रा जायगाया बबेयावमोन?
फिन : आह ‘मफोरनि गोजाम थानाय जायगाया चीन हादोरनि खोला-सोनाब ओनसोलमोन। आथिखालनि इउनानि हादोरसानि मुंआव रायजोआ बिथांमोननि गोजाम थाग्रा जायगामोन।
3. आह ‘मफोरा बेसेबां बोसोर आसामखौ खुंदोंमोन?
फिन : आहमफोरा 600 बोसोरनि बांसिन सम आसामखौ खुंदोंमोन।
4. आह ‘मफोरनि गोजाम रावआ मामोन?
फिन : आह ‘मफोरनि गोजाम रावआ टाइ एबा श्यानमोन।
5. आह ‘मफोरनि मोननैसो फोरबोनि मुं लिर।
फिन : आह ‘मफोरनि मोननैसो फोरबोफोरनि मुङा जाबाय– मे-डाम-मे-फी, उमफा, चाइफा, रिकखन, जासिंफा, लाइलुंखाम बायदि-बायदि।
6. लिरसुंथाइ लिर :
(क) लाचित बरफुकन (ख) सती जयमती (ग) टेङाइ म ‘हन (घ) देवधाइ फुकन (ङ) कृष्ण कान्त सन्दिकै (च) पद्मनाथ ग ‘हाइ बरुवा
फिन : (क) लांचित बरफुकन : आसामनि जारिमिनाव हादोर अनफावरि बीर होननानै बुङोब्ला गुबैयै लाचित बरफुकननि मुंखौ लानांगौ जायो। जारिमिनारि आह ‘म म ‘गलनि शराइघाट दावहानि गाहाइ बिबानखौ लाचित बरफुकनआ लानो गोनां जादोंमोन। म ‘गलफोरनि बेरेखायै लाचित बरफुकननि दावहा सामलायनाय सेल’आव जाय हारिमायारि बिबान, आब्रुथि आरो खौसेथिजों खामानि मावनाय बिदिन्थि मोननाय जायो। आसामनि जारिमिनाव, बेबायदि गुबुन बिदिन्थि गोरलैयै मोननो थाङा।
लाचित बरफुकननि जोनोमा 1612 ख्रिष्टाब्दआव जादोंमोन। जोनोम सान-अक्ट’ आरो जायगानि सोमोन्दै रोखा मिथियाब्लाबो गड़गावनि खाथि खालानिमोन होनना हमना लानाय जादों। बिथांनि बिफानि मुङा म ‘माइ तामुली बरबरुवामोन। म ‘माइ तामुलीनि उन्दैसिन फिसाज्ला लाचितआ साथाम बिदाफोर दंमोन। बिथांमोना जादौं- लालुकस ‘ला, मरंगी आरो भारधरा। उन्दै समनिफ्रायनो लाचितआ जोबोद गोहो गोरामोन। सैथो आरो रोखाथिया बिथांनि मोनसे आखु। लाचितआ उन्दैनिफ्रायनो बिफानि खामानि-दामानि मावनायखौ मेगन होनो खाबु मोनदोंमोन। बरबरुवा हिसाबै स्वर्गदेउनि बरच ‘रा, बिजिरसालि आरियाव बिफानि खामानि-दामानि, गुबुन-गुबुन गेदेर-गेदेर आरो मावख’गोराफोरजों सावरायनाय फोरखौबो लाचितआ नुदोंमोन। गुबै बाथ्रायाव बुंनो थाङोब्ला बिफानि रायजो सालायनायखौ नोजोर होनानै गोबां बाथ्रा सोलोंनो खाबु मोनदोंमोन।
जोबोद थाबैबो गावनि रोंगौथिनि बोलोजों राजानि न ‘खराव लाचितआ साख्रि मोनदोंमोन। गिबि समाव रायजोनि मन्थि गेदेमाया “गयः फाथै बोनथुमग्रा तामुली” महरै लाचितखौ साख्रिआव थिस ‘नो। बेनि उनाव साननैसोनि थाखाय ‘घ’रा बरुवा’ मासिखौ मोननो हायो। बे मासियाव थानाय समाव राजानि गराइसालिनि गराइफोरखौ नोजोर लाखिनायजों लोगोसे बेफोरखौ फोरोंथाइ होदोंमोन।
बेनि उनावसो ‘द ‘लिया बरुवा’ आरो ‘शिमलुगुरीया फुकन’ –नि मासियाव साख्रि मोनदोंमोन। बै समावनो मिरजुमलाया आसामखौ गाग्लोबनायाव लाचितआ दिखौमुखआव सुथुरफोरजों दावहा नांदोंमोन आरो गावनि आखा-फाखा रोंगौथिखौ दिन्थिनो हादोंमोन। लाचितनि आखा-फाखा आरो गाग्लोबनायनि हेंथायै जुजिनायखौ मिथिनानै बै समान आह ‘म राजा चक्रध्वज सिंहआ लाचितखौ सान्थ्रि गाहाइ खालामनायसै आरो बरफुकन मासियाव थिसननायसै। बेनि साननैसो उनाव 1667 मायथाइनि 20 आगष्टआव आह’म म ‘गलनि दावहा जागायजेनो।
म ‘गलजों गिबि दावहाया बुरलुंबुथुरनि साहा थानाय बाहबारियाव जागायो। बेयाव जायगा लानानै थानाय म ‘गलखौ गाग्लोबना आह’म सान्थ्रिया दावहाखौ जुरिजेनो। बेनि उनाव खोला रुगुंनि काजलीयाव थानाय म ‘गलनि खर ‘खौ आह ‘मफोरा गावनि सिङाव लाबोयो। इटाखुलियाव बादा लुनानै म ‘गलफोरा गावनि गोहोखौ बांहोनो नाजादोंमोनब्लाबो बेखौबो आह ‘म सान्थ्रिया थेर-बेथेर जानाय बे दावहायाव देरहानाया असमीया सान्थ्रिनि गेजेराव गावफोथाइथि लाबोदोंमोन, सानथ्रि गाहाइ महरै लाचित बरफुकनआ बाख्नायजादोंमोन।
औरंजेबनि बिथोन बादियै राम सिंहनि दैननायाव मोनसे गेदेर सान्थ्रि हानजाया फिन आसामखौ गाग्लोबनो फैनायसै। लाचित बरफुकनआ मोजाङै सानना मोनदांदोंमोनदि सुथुरा जेसेबांनो गोहो गोरा जायाथों मानो, साफ्रोम असमीया साथ्रि आरो साथ्रि गाहाइया गावनि बिबानखौ मोजाङै फालियोब्ला बिथांमोना म ‘गलखौ फेजेननो हाथारगोन। बिथाङा बेयावबो एरैबादि फोसावना होनायसैदि, सोरबाफोर गावनि बिबानखौ थियै मावफुङाब्ला एबा गावनि मावनांगौ हाबायाव गोहैलो खालामोब्ला बे बाथ्राखौ मिथिनाय लोगो लोगोनो बै मानसिनि खर ‘खौ दानस ‘नायु जागोन।
आमिनगावनि खाथियाव गड़ (बान्दो) मोनसे खोनायनि गाहाइ बिबाना लाचितनि सासे बिमाइनि आखाइयाव गोग्लैदोंमोन। बिमाइया बिबान मानिना सोलियैनि थाखाय गड़ खोनाय खामानिया जोबोद उन जाना थानायाव लाचितआ रागा जोंनायसै आरो थुंग्रि दैखांना बिमाइखौ दानगासेयावनो सनै खालामना बुंनायसै-‘हादरनिख्रुइ बिमाइया देरसिन नङा’। लाचितनि बेबादि थिउरिया रागा जोंनायखौ नुनानै गड़नि खामानि मावग्रा मानसिफोरा जोबोद गिखांनायसै आरो सिमा गैयि खामानि मावनानै हरसेनि गेजेरावनो गड़नि खामानिखौ मावफुंनायसै। बे गड़आ दा’ बिमाइ दानस ‘नाय गड़’ (ममाइ कता गड़) मुड़ै मिथिजायो।
आह’म आरो म ‘गलनि जोबथा दावहायानो जादों– शराइघाटनि दावहा। 1671 मायथाइनि मार्च दाननि गेजेर खोन्दोआव बे दावहाया जादोंमोन। बै समाव लाचितआ गोब्राब जब्रायाव गोग्लैना दंमोन। आह ‘म सान्थ्रि गाहाइ लाचितनि मोदोमा जोबोद गाज्रि होनना मिथिनानै असमीया सान्थ्रिफोरनि गोहोबोलोआ एसे लोरबां जादोंमोन। सान्थ्रिफोरनि नावफोरा उनजों फावसायबोगासिनो दंमोन। लाचित बरफुकनआ हसिख्रावनायसै– “ओइ, नोंसोर मा खालामदों? स्वर्गदेवा आंखौ गुवाहाटीखौ रैखा खालामनानै सुथुरजों दावहा नांनो बिबान होना दोनदों। आं दा दावहा नागारनानै बिसि–फिसाफोरनि खाथियाव थांगोन नामा? आरो नोंसोर आंखौ सोङालासिनो नावखौ बैथिंजाय मानो लांदों?” रागाजों लाचित बरफुकनआ नोरजिया देहाखौ लानानैनो गोहो. गोरा जाखांनायसै।
सिमा गैयै गोहो बोलोजों असमीया नावफोरा फैनानै म ‘गलनि नावफोरनि-गेजेराव हाबबाय आरो मोननैबो हानजानि गेजेराव गोख्रों दावहा जानायसै। बे दावहायाव म ‘गलफोरनि नावफोरा फारियै उनफिनलांनायसै। असमीया सान्थ्रिफोरा दावहायाव देरहानायसै। बे दावहाया शराइघाटनि दावहा होननानै मुंदांखा। शराइघाटनि साननैसोनि उनाव गुवाहाटीयावनो लाचित बरफुकनआ थैयो। जानो हागौ गोब्राब जब्राखौ नेवसिनानै दावहा नानायनि थाखायनो बेबादि जादों। बिथांनि थैनाया दावहा देरहानायनि रंजानायाव दुखु लाबोदोंमोन। बेबादि हादोर अनफावरि बीरखौ रावजोंबो रुजुजाया।
(ख) सती जयमती : सती जयमती राजखुंग्रिनि समाव आह ‘म रायजोनि राजखान्थि हालोदआ जोबोद गोब्राब जानानै दंमोन। मन्थ्रि लालुकस ‘लाया अब्ला आसामनि गसंग्रा राजा–जग्रा राजामोन। गुबुन-गुबुन बैसो गोरा राजखुंगुर थासेयावबो लालुकस ‘लाया जिब्रै बोसोर बैसोनि चामगुरीया हारिसानि उन्दै ग ‘हाइखौ लाबोनानै 1679 मायथाइनि काति दानाव आसामनि राजा खालामो। आह ‘मनि बादिब्ला छुलिकफा आरो हिन्दुनि बादिब्ला रत्नध्वज सिंह मुं दोननायसै। बैसोआव उन्दै नुनानै फोरजानि गेजेराव ल ‘रा राजा (उन्दै राजा) मुङासो मंदांखा जानायसै।
लालुकस ‘लाया उन्दै राजाखौ बुंनायसै, राजा जानो हानाय गुन थानाय आरो बैसोगोरा गोबां थासेयावबो बिथांखौ राजा खालामनाय जाबाय। बे खोथाखौ राजखुंगुरफोरा सहायनो हायाखै। सोर सासे राजखुंगुरआ माब्ला स्वर्गदेवनि जिउ लायो बेनि थिग गैया। बेनिखायनो सुथुर गैयि जानोब्ला राजखुंगुरफोरखौ जखम खालामनानै राजा जानो हायि खालामनांगोन आरो बेखौ खालामनोब्ला गिबियाव गिनोगोनां गेदेमा मावख ‘गोराफोरखौ बोखलायनांगोन। उन्दै राजानि मेलेमाव लालुकनि बाथ्राया गो हाबनायसै। लोगो-लोगो लालुकआ ल ‘रा राजानि इसारा मोननानै राजखुंगुरफोरनि देहायारि ख’ हा खालामनाय, राजखुंगुर बुथारनाय खामानिखौ मावजेननायसै।
तुं-खुंगीया हारिसानि लाङि गदापाणिनि अनगायै गुबुन हारिनि राजखुंगुरफोरखौ लालुक बरफुकननि हानजाया हमनायसै आरो सोरखौबा अंग ख’ हा खालामनायसै, सोरखौबा बुथारनायसै। ग ‘बर राजानि राजखुंगुर लाङि गदापाणिखौ लालुकनि हानजाया हमनो हायैयाव लालुक स ‘लाया जानो-लोंनो खहाबा जानायसै। मन्थ्रि लाइ थेपेना बरग ‘हाइया गदापाणिनि बिहाव आरो हायेन आसामनि बदन बरफुकनआ बिनि बिगुमैमोन। फारसेथिं गदापाणिखौ हमनो हायासो हाया, बियो बहा दं आरो बबेआव थाखो बेनि जेबो खौरांखौनो लालुकनि हानजाया दिहुननो हायाखिसै। गदापाणिनि बिसिनि मुङा जयमती राजखुंग्रिमोन। गदापाणि आरो राजखुंग्रि जयमतीया लाइ-लेचाइ मुंनि सानै फिसाज्लाजों
तुंखुंगावाव रायजो जानानै दोंमोन। लालुकआ छुलिकफानि राजखुंगुरफोरखौ हमना बुथारनाय रादाब मोननानै सानै गथ ‘खौ नागा रायजोनि बबेबा मोनसे रेखाथि जायगायाव दोनखोमाहैदोंमोन। राजखुंगुर गदापाणिखौबो गथ ‘सानैजों लोगोसे थाखुमाहैनो थाखाय जयमतीया खुलुमथाबदोंमोन। नाथाय गदापाणिया बेफोरबादि गिख ‘ला जाना थानो राजि जायाखिसै। जयमती राजखुंग्रिया राजखुंगुरखौ गावनि रायजो आरो फोरजानि दहाय होनानै बुजायबायदि बिथाङा थायाब्ला रायजोआबो थानाय नङा। बेबायदि जयमतीया खुथार-खुथार आरज गाबनायखौ नुनानै जोबथारनायाव गदापाणिखौ खारखुमाना थाहैनो राजि खालामनायसै। गदापाणिया खारखुमाबाय। नागानि महर लानानै नागाहाजोनि गेजेराव हाबहैनायसै।
राजआफादाव लाबोनानै स्वर्गदेवनि बिथोन खोनासं होनानै लालुक स ‘लाया जयमती राजखुंग्रिखौ गदापाणिनि खौरां सोनायसै ‘गदापाणिया बबेयाव दं?’ राजखुंग्रिया जेबो फिननाय होआलासिनो सिरि थानायसै। लालुक स ‘लाया सावदांखौ बिथोन होबाय, जयमतीखौ जेरेङानि सेरफाङाव निजोम जायगायाव लांनानै जायखि जाया राहायैब्लाबो जयमतीनि खुगानिफ्राय गदापाणिनि खौरां लाबोनानै गोख्रै होथारनांगोन। सावदांआ जयमतीखौ जेरेङा फोथारनि निजोम जायगायाव लानानै थांनायसै।
जयमतीखौ सावदाड़ा जोबोद बुजाय-आजाय, अनफ्लानानै गाज्रि थुलुंगा होनानै सिगि-सग’ खालामनानै बिनि खुगानिफ्राय गदापाणिनि खौरां दिहुननो हायियाव सावदाङा राजखुंग्रिखौ मोनफा-मोननै साजा होलांनो हमनायसै। जयमतीया गासैबो साजाखौनो सहायसुलि बैसोमुथिबादि सिरियै सहायना थानायसै। बेबादि जिब्रै सान निजोम जेरेङा फोथाराव साजा मोननानै इंराजी 1679 मायथाइनि 13 सैथो (सैत्र) बृहस्पतिबारखालि दशमीनि अखाफोर हाबसि समाव जयमतीया जिउ गारो। असमीया आइजोनि जोबनो गैयि गोहो बोलो, फिसाइ सिबिनायनि गेदेर आदर्शनि गोथार नेरसोन महरै मुगा-मुगा गालांबाय।
सती जयमतीनि गेदेर फिसाज्ला स्वर्गदेव रुद्रसिंहआ बिमानि गोसोखां नेरसोनखौ अराय जोरथाय महरै लाखिनायनि थांखिजों जेरेङा फोथाराव 1679 मायथाइयाव लैथोबादि गेदेर फुख्रि मोनसे जावहोनायसै आरो जयसागर फुख्रि मुं दोननायसै। बेनि बा बोसोर उनावसो रुद्रसिंह स्वर्गदेवआ बिमा जयमतीनि थैजों गोथार खालामना दोनलांनाय जेरेङा फोथाराव राजथावनिखौ गड़गावनिफ्राय दैखांना लाबोनायसै आरो रंपुर मुं दोननायसै। बेनि अनगायैबो स्वर्गदेवआ गोजाम आलि आरो गेदेर आलिनि गेजेराव बिमानि मैदाम (गोथैसालि) लुनायसै। बे गोथार मैदामा दिनैसिमबो सती जयमतीनि गोसोखां नेरसोनखौ फोथांना लाखिदों।
(ग) टेङाइ महन : पण्डित टेङाइ महनआ 1715 इं मायथाइयाव चराइदेउआव महुं-माइचेउ न ‘खरनि तकम्बररिनि न ‘खराव जोनोम जादोंमोन। बिथाङा साथाम बिदा-फंबायनि मादाव दुइसिनमोन। आह ‘म खुंथाइनि जोबनायथिं सांग्रां आरो मेलेमजिबि आह ‘मफोरा मोनसे जोबोद गेदेर खैफोदआव गोग्लैदोंमोन। बेनि जाहोना जादों- आह ‘मनि राज उलाफादआव (दरबार) गुबुन-गुबुन जाहोनाव आह ‘म रावनि सोलायै असमीया रावआ लासै-लासै गोसारनो हमदोंमोन।
आह ‘म रावआ लासै-लासै नेवसिजाबोदोंमोन। बिसोरनि सानफ्रोमबोनि जिउआव खोथा-बाथ्रा रायज्लायनायावबो बाहायनाया खमायबोनो हमदोंमोन। बे बिथिङाव सांग्रां मेलेमजिबि आह ‘मफोरा साननो गोनां जाना फैबाय दि- मोनसे समआव आह ‘म रावआ गोमालांथारोब्ला आसामनि मोनसे थांनानै थानाय सोदोमस्रिया आसामनि जारिमिननिफ्राय गोमालांगोन।
मानोना आह ‘मफोरा आसामसिम फैनायाव थुनलाइ, जारिमिन, दोहोरोम, नेमखान्थि गोनां ज्यतिस, सान्थौआरि आयदानि गोबां बिजाबफोर लाबोफादोंमोन। बेफोरनि अनगायैबो उननि आह ‘म खुंथाइनि समावबो गुबुन-गुबुन आयदानि गोबां बिजाब लिरदोंमोन। बै बिजाबफोरा आह ‘म रावजोंनो लिरजादोंमोन। आह ‘म सोदोमस्रि हारिमुनि गासैबो बाथ्रा बै बिजाबफोराव लिरनाय जादोंमोन। इयुन जोलैया जाहाथे आह ‘म रावखौ सोलोंनो हायो बेनि थाखाय टेङाइ महन बिथाङा गांसे आह ‘मनि सोदोब बिहुं लिरनायनि खामानि आखाइयाव लायो। मानोना रावखौ फोथांना लाखिनोब्ला गिबियाव रावनि सोदोबफोरखौ हमथाना लाखिनांगोन।
1795 इं मायथाइयाव गौरिनाथ सिंहनि खुंथाइनि जोबनायथिं बिथाङा ‘बर’ काकत हु मुं पुथि” मुंनि गांसे सोदोब बिहुं बिजाब लिरो। खासि बिलाइयाव लिरनाय बे बिजाबाव गां 42 बिलाइ दं मोन। बे ‘बर काक़त हु-मुं’-नि आनगायैबो टेङाइ महन बिथाङ लिरनानै गालांनाय ब्रैजिनिख्रुइबो बांसिन बिजाब मोननाय जादों। टेङाइ महन बिथाङानो जादों आसामनि गिबिसिन सोदोब बिहुं लिरगिरि। बिथांखौ आह ‘म रावनि बिजाब दानस्लायनायनि थाखाय इंराज साहेबआ बिलातसिम लाना थांदोंमोन होनना मिथिनो मोनो। बे गेदेमा सोदोब बिहुं लिरगिरिया 1823 इंराजि मायथाइयाव डिब्रुगड़ जिलानि खुवाङाव थैयो।
(घ) देवधाइ फुकन : 1912 इं मायथाइनि अक्ट’ बर दाननि मोनसे मोजां समाव बै समनि चराइदेउ महकुमानि सिङाव थानाय खालैघ ‘गुरा मौजानि बेन्दोङाव थानाय आखैया देवधाइ गामिनि मोनसे गेजेर थाखोनि न ‘खराव डम्बरुधर देवधाइ फुकनआ जोनोम जायो। बिफानि मुङा गंगाराम फुकन आरो बिमानि मुङा चादै फुकन। बिफा गंगाराम फुकनआ सासे सोलोंथाइ मों मोनग्रा मानसिमोन। बिथाङा लाकुवा नाहर साहा बागाननि केरानीमोन आरो बेनि उनाव गामिनि गावबुटा जादोंमोन। डम्बरुधर फुकनआ एम. भि. फरायसालिनि उनाव गोबां सिगांलांनो हायाखैमोनब्लाबो टाइ राव-हारिमुखौनो हमथाना गोसो होथाबनानै फरायसंनो लायो।
बिथाङा बिदा सरुनाथ देवधाइ फुकन आरो नन्दनाथ देवधाइ फुकननिफ्राय न ‘आवनो टाइ रावनि सोलोंथाइ लादोंमोन। इसे समनि गेजेरावनो टाइ राववाव फुकनआ सासे पण्डित महरै न’ आवनो, थानानै आबाद मावनायजों लोगोसे टाइ रावखौ चर्चा (सर’) खालामबाय थानायसै। बै समावनो आसामनि जारिमिन आरो जावखांथाइ बिफाननि गाहाइ डा० सूर्यकुमार भुयाया 1931 इं मायथाइयाव टाइ रावनि रोंगौसा महरै टाइ आह’म जारिमिन रावसोलायनायनि थाखाय गुवाहाटीयाव लिंनानै लाङो।
आसाम जारिमिन आरो जावखाथाइनि बिफानाव ब्रै बोसोर खामानि मावनायनि उनाव 1935 इं मायथाइयाव गावनि गोसोबादियै साख्रि नागारनानै न’आव थाङो। फुकननि दैदेननायाव 1936 इं मायथाइयाव पाटसाक’ –नि भेसेली बिलोनि रुगुङाव आसाम थाखोआव ‘फुराल सबाह ‘ खुंनाय जायो। बिथाङा 1964 इं मायथाइयाव टाइ राव-हारिमु बुरखांनायनि थाखाय दंफां- औवाजों गंसे फरायसालि न’ लुनानै होयो। बेनो जादों मिरु टाइ एकाडेमी, पाटसाक’।
1975 इं मायथाइयाव सदौ असम बौध्द फ्रालुं संघ गायसंनाय, 1981 इं मायथायाव दिल्लीयाव जथुमनाय ‘गिबि हादर गेजेरारि टाइ सोलोंथाइ’ सन्मिलनाव बाहागो लानानै गं 19 हादरनि टाइ पण्डितफोरजों आह ‘म रावनि सोमोन्दै सावरायनायाव बाहागो लादोंमोन। बिथाङा धेमाजीनि प्रमद भवनआव 1981 इं मायथाइनि 8 एप्रिलाव सासानजा (पुर्वान्सल) टाइ साहित्य सभा दानाय आरो गायसनगिरि आफादगिरिनि बिबानखौ आजावो। 1984 इं मायथाइयाव बेंककआव खुंगा नैथि हादरगेजेरारि टाइ सोलोंथाइ सन्मिलनसिम हांख्रायहरजानानै दान मोनसे सम थाइलेण्डनि चियांमाइ नोगोरमायाव थांनानै टाइ राव-हारिमुनि सोमोन्दै फरायसङो।
आसामनि फारसे खर ‘निफ्राय गुबुनफारसे खर ‘सिम टाइ राव-हारिमु गोसारनायनि थाखाय गिदिंबायग्रा मलुं डम्बरु देवधाइ फुकनआ डिब्रुगड़ जिलानि लेङे रीयाव खुंनाय पुर्वान्सल टाइ साहित्य सभानि जिथि जथुम्मानि उनखालि (अखानायै)15-02-93 खालाराव बेलासि समाव हरखाब बिखानि बेरामाव डिब्रुगड़ फाहामसालियाव जिउ गारो।
(ङ) कृष्णकान्त सन्दिकै : 1898 इं मायथाइयाव कृष्णकान्द सन्दिकैया ज’ रहाटाव जोनोम जायो। बिफानि मुङा राधाकान्त सन्दिकै आरो बिमानि मुङा नारायणी सन्दिकैमोन। बिथाङा 1913 इं मायथाइयाव ज ‘रहाट सरकारी हाइस्कुलनिफ्राय सेथि थाखोआव एन्ट्रेन्स आनजादखौ उथ्रिनानै कटन कलेजाव फरायो। बेनिफ्रायनो सेथि थाखोआव आइ. ए. आनजादखौ उथ्रिनानै कलिकातासिम थाङो आरो बैयाव संस्कृत कलेजनिफ्राय 1917 इं मायथायाव बि. ए. डिग्रिखौ लायो।
1919 इं मायथाइयाव कलिकाता मुलुग सोलोंसालिनिफ्राय संस्कृतनि बेद ग्रुपआव सेथि थाखोआव सेथि जायगा आवग्रिना एम. ए. खौ उथ्रियो। बेनि उनाव बिलातसिम थांनानै अक्सफ ‘र्ड मुलुग सोलोंसालिनिफ्राय गोदान जारिमिन बिफानाव मेजर लानानै 1923 इं मायथाइयाव एम. ए. बिमुं मोनो। 1923-27 इं मायथाइयाव पेरिछ आरो बार्लिन मुलुग सोलोंसालियाव ग्रीक, लेटिन, इटालियान आरि राव सोलोङो। 1930 इं मायथाइयाव ज ‘रहाट जे. बि. कलेज गायसननाय लोगोसे बेनि गिबि बेथन गैयि गोरायुं जायो। इंराजि 1948 मायथाइयाव गुवाहाटी मुलुग सोलोंसालि गायसननायाव बेनि गिबिसिन उपाचार्य थिसनथाइ मोनो आरो 1957 इं मायथाइसिम बे मासियाव थायो।
कृष्णकान्त सन्दिकैया सासे पण्डितमोन। जुनियायै संस्कृतआव आखा-फाखा पण्डितमोन। बिथांनि सेबखांजानाय इंराजी बिजाबा गांथाम-श्रीहर्षनि गोजाम चरित इंराजियाव राव सोलायनाय आरो टीकानि सोमोन्दै लिरनाय बिजाब “निषध सरित” (1934), स ‘मदेवनि जशस्तिफोरनि बिथायाव लिरनाय बिजाब “जशस्तिलक एण्ड इन्डियान कालसार” (1949) आरो माराठी लिरगिरि प्रबरसेननि नंगुबै बिजाब सेतुबन्धननि राव “सेतुबन्धन”। बेनि अनगायैबो गुबुन-गुबुन बिजिरसंनाय लाइसिफोराव भारतनि सोमोन्दै मोननैसो लिरबिद्रां लिरदोंमोन।
इंराजि 1951 मायथाइयाव खुंनाय अखिल भारतिय प्रच्यबिद्या सन्मिलननि लक्ष्नौ जथुम्मानि आफादखौ दैदेनदोंमोन। 1953 इं मायथाइयाव वालटेयाराव खुंनाय गेजेरारि-मुलुग सोलोंसालि आफादनि आफादगिरिमोन। बिथाङा असमीया थुनलाइयावबो गोसो गुदुंमोन। फरायसालियाव फरायफुनाय समावनो नकुल चन्द्र भुयामोनजों लोगो नांनानै आखाइजों लिरनाय लाइसि दिहुनदोंमोन। सिफुं, मिलन, आबाहन, चेतना लाइसि आर आरो खौरां बिलाइफोराव लिरबिदां लिरदोंमोन। 1929 इं मायथाइयाव बिथाङा “आसाम सात्र सन्मिलन” नि आफादखौ दैदेनदोंमोन। इंराजि 1937 मायथाइनि ‘आसाम साहित्य सभा ‘नि गुवाहाटी जथुम्मानि आफादगिरि जादोंमोन। भारत सरकारआ बिथांनो 1955 इं मायथाइयाव पद्मश्री आरो 1967 इं मायथाइयाव पद्मभुषण बिमुंजों मान होदोंमोन। गुवाहाटी आरो डिब्रुगड़ मुलुग सोलोंसालियाव बिथांनो डि.लिट. बिमुं होदोंमोन।
बिथाङा जे.बि. कलेजनि बिगियान बिफाननो जिसे रोजा आरो चन्द्र कान्त अभिधाननि थाखाय बाजि रोजा रां दान होदोंमोन। थैनायनि-सिगां सिगां गावनि बिजाब बाख्रिखौ गुवाहाटी मुलुग सोलोंसालिनो दान होलाङो।
(घ) पद्मनाथ ग ‘हाइ बरुवा : इंराजि 1871 मायथाइनि 24 अक्ट’ बरखालि सा-लक्ष्मिपुरनि नकारि गामियाव पद्मनाथ ग ‘हाइ बरुवाया जोनोम जादोंमोन। बिथांनि बिफानि मुङा घिनाराम आरो बिमानि मुङा लक्षी देबीमोन। बिथाङा सा-लक्षिमपुरनिफ्राय बृत्ति आनजादाव उथ्रिनानै शिवसागर हाइस्कुलाव मुं थिसनदोंमोनब्लाबो उनाव कहिमा हाइस्कुलनिफ्राय 1890 इं मायथाइयाव एन्ट्रेन्स आनजादखौ उथ्रियो।
गोजौ सोलोंथाइनि थाखाय बिथाङा कलिकाता सिम थाङो आरो एफ. ए. आरो आइन फरायो। बिथाङा गिबियाव कहिमा गेजेर फरायसालियाव गाहाइ फोरोंगिरि महरै हाबो आरो उनाव ज’रहाटआव बोसोरनैसो फोरोंगिरि हाबा मावनानै 1893 इं मायताइयाव तेजपुर नरमाव स्कुलाव फैयो आरो बैयावनो थाजोरै थानो हमो। बिथाङा सासे बयजोंबो मानिजाग्रा आरो सिबिजाग्रा थुनलाइगिरिमोन।
पद्मनाथ ग ‘हाइ बरुवानि खन्थाइ, नायजाब, सल ‘मा आरिया थुनलाइनि गासैबो बाहागोआव आखाइ दंमोन। बिथांनि मुंदांखा खन्थाइबिजाबफोरा जादों–जुरणि, लीला, फुलर चानेकी। जारिमिनारि नायजाबफोरा जादों– जयमती, गदाधर, साधना, लाचित बरफुकन, बानरजा। मिनिथाव नायजाबफोरा जादों– गावबुढ़ा, टेट ‘न तामुली, भुत ने भ्रम। सल ‘माफोरा जादों– भानुमती, लाहरी। जिउखौरां जादों– म ‘र स ‘वरणी आरो बुथुमनायफोरा जादों– साहित्य संग्रह, जीवनी संग्रह। दोहोरोमारि बिजाबफोर–श्रीकृष्ण, गीतासार। बेनि अनगायैबो बिथाङा भुमखौरांनि आइना, आखल सोलोंनाय, सोलोंथाइनि जोलै आरि गोबां बिजाब लिरदोंमोन।
बिथाङा सुजुनाय लाइसिफोरा जादों– बिजुलि, आसाम बन्ति आरो उषा। बिथाङा शिवसागराव खुंनाय साहित्य सभानि गिबि जथुम्मानि आफादगिरिमोन। बिथाड़ा तेजपुरनि बाण रंगमन्सजों गोथौवै लोब्बा दंमोन। गोबां बोसोर तेजपुर पौरसभानि आफादगिरिमोन। बिथाङा गुबुन गुबुन थुनलाइयारि आरो समाजारि आफादनि जथुम्मायाव आफादगिरि जाना दैदेनदोंमोन। खन्थाइगिरि पद्मनाथ ग ‘हाइ बरुवाया 1946 इं मायथाइनि 7 एप्रिलआव सोरगियारि जायो।
| Chapter No. | CONTENTS |
| खोन्दो – 1 | आह ‘मफोर |
| खोन्दो – 2 | काछारनि सुबुं हानजाफोर |
| खोन्दो – 3 | कारबिफोर |
| खोन्दो – 4 | क ‘च राजबंशीफोर |
| खोन्दो – 5 | गरिया-मरिया आरो मुसलमानफोर (देशी) |
| खोन्दो – 6 | गार ‘फोर |
| खोन्दो – 7 | सावथालफोर |
| खोन्दो – 8 | साहा बागानीया सुबुं हानजा |
| खोन्दो – 9 | चुतीयाफोर |
| खोन्दो – 10 | ठेंगाल कछारीफोर |
| खोन्दो – 11 | डिमासाफोर |
| खोन्दो – 12 | कलिताफोर |
Note- यदि आपको इस Chapter मे कुछ भी गलतीया मिले तो हामे बताये या खुद सुधार कर पढे धन्यवाद।