Bodo Medium Class 10 Social Science Chapter 4 Question Answer उदांस्रि सोमावसारनाय आरो आसामाव हारिमायारि जांख्रिखांनाय Indian Freedom Movement and National Awakening in Assam. Class 10 Social Science Question Answer in Bodo to each Chapter is provided in the list of SCERT, NCERT, SEBA सामाज बिगियान Class 10 Question Answer दिए गए हैं ताकि आप आसानी से विभिन्न अध्यायों के माध्यम से खोज कर सकें और जरूरतों का चयन कर सकें Class 10 Social Science Chapter 4 Question Answer Class 10 Bodo Medium Social Science Chapter 4 Questions Answer. SEBA Bodo Medium Class 10 Social Science Chapter 4 उदांस्रि सोमावसारनाय आरो आसामाव हारिमायारि जांख्रिखांनाय Notes covers all the exercise questions in NCERT, SCERT.
सों 11. आसाम सिकितसा कलेज (आसाम देहाफाहामग्रा कलेज) गायसननायनि सुंद’ जारिमिन लिर।
फिन : 1900 माइथायाव डिब्रुगड़ाव ड० जन बेरी ह’वाइटनि रां अनसुंथाइजों ‘बेरि ह ‘वाइट मेडिकेल स्कुल’ गायसननाय जादोंमोन। नैथि मुलुग दावहानि उनाव बे मेडिकेल स्कुलखौ खाथिनिनो देहाफाहामसालिनि केम्पासाव लानानै थांदोंमोन आरो बेखौ दावहानि समाव आमेरिकानि सान्थ्रिफोरा बाहायदोंमोन।
हादोरा उदांस्रि मोननायनि उनाव 1947 मायथाइनि 3 नबेम्बरखालि बे स्कुलखौ फसंथानारियै ‘आसाम देहा फाहामसालि कलेज’ मुं होनाय जायो। देहाफाहामनाय आरो देहा फाहामनाय सोलोंथाइनि गोनांथिनि फारसे नोजोर होनानै गोदानै देहाफाहामसालि कलेज गायसननायनि गोनांथिया गोख्रों जानानै फैदोंमोन।
1959 मायथायाव रायजो सोरखारा नैथि देहाफाहामग्रा कलेज गायसननायनि लाहार फाहार खालामदोंमोन। उनाव सोरखारा गुवाहाटी आरो शिलचराव गनै देहाफाहामसालि कलेज गायसननायनि थिरांथा लायो। बै थिरांथा बादियै 1960 मायथाइनि 20 सेप्टेम्बरखालि गुवाहाटी देहाफाहामसालि कलेजखौ फसंथानारियै बेखेवनाय जायो आरो 1968 मायथाइयाव शिलचर देहाफाहामसालि कलेजखौ गायसननाय जायो।
गोलाउ फिननायनि सोंनाय
सों 1. असमीया भाषा उन्नति साधिनी सभानि बिफाव आरो हाबाफारिनि सोमोन्दै लिर।
फिन : 1837 मायथाइनिफ्राय 1873 मायथाइसिम असमीया रावनि आंगोथि रैखा आरो फरायसालि, अफिस-आदालताव बांला रावनि बदलै असमिया रावखौ बाहायफिननायनि जा सोमावसारनाय जागायदोंमोन, बे सोमावसारनाया आसामाव रावबिथायारि हारिमायारि सांग्रांथि दानायाव गोबां बिहोथाइ होदोंमोन।
कलिकतायाव जौगा सोलोंथाइ लानो थांनाय असमीया सेंग्राफोरा असमीया राव थुनलाइ जौगाहोनायनि थाखाय गोख्रों लामा लाखाबायमोन। नाथाय जेब्ला बांला सेबखांसालियाव असमीया रावनि गावनो गाव सालायनायनि सायाव गादबो बेखौ नुनानै बै समाव कलिकतायाव थानाय आसामनि फरायसाफोरा असमीया राव आरो थुनलाइ जौगाहोनायनि थाखाय खौसे जाफिननायनि खोथाखौ साननो लायो। बे थांखियैनो 1888 मायथाइयाव ‘असमीया भाषा उन्नति साधिनी सभा’ मुंनि गौथुम जोनोम जायो।
बे आफादा असमीयाफोरनि गेजेराव खौसेथि आरो हारिमायारिबादनि खोथा सानखां होदोंमोन। असमीया रावनि मोनसे गोख्रों बिगियानारियै जौगानायजों लोगोसे आसामनि गासैबो गुदि फरायसालियाव गेबें आरो जौगाथाखोनि रावखान्थि बाहाय होनायनि थाखाय हाबाफारि लादोंमोन। बेनि अनगायैबो बे आफादा आसामनि मोनसे आबुं समाजारि जारिमिन लिरनाय आरो संस्कृत एबा गुबुन गुबुन रावनि मख ‘जाथाव बिजाबफोरखौ असमीया रावाव राव सोलायनाय खामानिखौ मावनो लादोंमोन। बे आफादनि नाजानायावनो सोरखारा हेमचन्द्र बरुवा साबसिन हामसिन मावथाइ ‘हेमकष’ फोसावनाय खामानिखौ आखाइयाव लादोंमोन।
‘असमीया भाषा उन्नति साधिनी सभा’ आ जारिमिन, हारिमु, थुनलाइ आरो रावनि सोमोन्दै गावसोरनि गेजेराव गियानारि सावरायनायखौ लाखिदोंमोन आरो फारियै आसामनि बायदि जायगायाव बेनि दालाय गायसननो नाजादोंमोन। असमिया सेंग्राफोरा कलिकटा सोलोंथाइ फोजोबनानै आसामाव फैना क’हिमा, तेजपुर, डिब्रुगड़, शिबसागर, नगाव, ज’रहाट, बरपेटा, ग’वालपारा, गुवाहाटी बायदि जायगायाव बे आफादनि दालाइ आफाद दानो थुलुंगाखांदोंमोन। मख ‘जाथावदि बे आफादजों दिहुनजानाय लाइसि ‘ज’नाकी ‘या आसामाव मोनसे गोदान मुगा सोरजिदोंमोन।
सों 2. आसाम छात्र सन्मिलननि बिहोमानि सोमोन्दै लिर।
फिन : 1916 मायथाइयाव आसाम छात्र सन्मिलनखौ दानाय जादोंमोन। बेयो फरायसाफोरनि मोनसे गौथुम आरो आसामनि जारिमिनाव बे गौथुमखौ दानाया मोनसे मख’जाथाव जाथाइ। बे फरायसा गौथुमनि गिबि जथुमाया लक्षीनाथ बेजबरुवानि आफाद दैदेननायाव गुवाहाटीयाव खुंजादोंमोन। बे गौथुमनि गुबै थांखिया जादोंमोन असमीया रावनि जौगाहोनाय।
आसाम छात्र सन्मिलना आसामनि बायदि फरायसालि आरो कलेजफोरनि फरायसाफोरजों रायज्लायलायनानै मोनसे मोजां सोमोन्दो गायसननो नाजादोंमोन। बे छात्र सन्मिलना गिबियाव राजखान्थियारि सावरायनाय एबा राजखान्थियाव सांग्राङै सरजाबफायाखैमोन, नाथाय उनाव हादरनि हारियारि सोमावसारनायाव सांग्राङै बाहागो लायो। भारतनि उदांस्रि सोमावसारनायनि हे फाजाबहोयि, आयेन मानिय मोसावसार नायफोराव आसामाव फरायसाफोरखौ मैखोम बाहागो लानाय नुनो मोनो। हेफाजाबहोयि सोमावसारनायनि बिथिङाव आसामाव बे गौथुमनि फरायसाफोरानो सोमावसारनायनि लिंथुमग्रा, दैदेनग्रा आरो बाहागो लाग्रा जादोंमोन।
गुबुनारि फानजा मुवा गुबैयै जौ, आफिं, गुबुनारि ग ‘ला फानथिंनाय मोखाङाव पिकेटिं खालामनाय, मेल खुंनाय, होनजा सुरनाय दिहुननाय बेफोर गासैबो खामानिखौ फरायसाफोरा आगदारि बिफाव लानानै मावदोंमोन।
1930 मायथाइयाव आसाम छात्र सम्मिलननि मोनसे जर ‘खा जथुमायाव फरायसाफोरखौ आयेन मानियि सोमावसारनायाव गद आरो गोथोंयै दैदेननाय थांखियै विष्णुराम मेधिखौ आफादगिरि आरो बिजय चन्द्र भागवतीखौ नेहाथारि महरै लानानै मोनसे हाबा गथुम दानाय जादोंमोन। बे छात्र सन्मिलना कानिंहाम सार्कलारनि बेरेखा खालामदोंमोन। बिदिनो बे फरायसा सन्मिलना हारियारि गोरोबलायनाय आरो हारिमायारि सांग्रांथि बांहोनायनि अनगायैबो आसामनि सोलोंथाइ, थुनलाइ हारिमु सर्सा खालामनाय बिथिङाव बिहोमा होबोदों।
सों 3. रायत सभाफोरनि थांखि आरो बिफावनि सोमोन्दै लिर।
फिन : 19 जौथाइनि जोबनायथिं आबादारिनि बायदि जेंना सुस्रांनायनि थाखाय रायत सभानि जोनोम मोनदोंमोन। बिदि रायत सभानि मादाव दोंमोन ‘तेजपुर रायत सभा’ आगे ‘नगाव रायत सभा’। बे रायत सभाफोर दानायाव गेजेर थाखोनि मानसिफोरा गाहाइ बिफाव लादोंमोन।
रायत सभाया आसामाव ब्रिटिस सोरखारनि बाहायनाय गोदान हा खान्थि आरो खाज ‘ना खान्थिनि हेंथा होदोंमोन। बे रायत सभाफोरनि गुबै थांखिया जाबाय ग्रेजिं खाजोना बन्द खालामनाय, हानि खाजोना बांनायखौ खमायनाय आरो बंगनिफ्राय हाबफैनायखौ होबथानाय। बबेखानि 1861-1893 मायथाइयाव सोरखारा आसामाव हानि खाजोना बांहोनायनि हेंथायाव सा-कामरुपनि रङिया, लसिमा, सर्थेबारि आरो दरं जिला बेन्दोङाव थानाय पथरुघाट आबादारि बिग्रायनायाव बे रायत सभाया जेबो बाहागो लायाखैमोन।
लेनथारियै खायसे बोसोर रायत सभाफोरा सिरि थानायनि उनाव 1930-34 मायथाइनि आयेन मानियि सोमावसारनायनि समाव आसाम प्रदेश कंग्रेछ कमिटिनि दैदेननायाव बे रायत सभाफोरा सांग्रां जाफिनदोंमोन। नदुवार, सयदुवार, शिबसागर आरो दरंआव गोदान रायत सभा दाजादोंमोन। आयेन मानियि सोमावसारनायनि समाव रायत सभाफोरा 50 जौखोन्दो हानि खाजोना खमायनायनि दाबि दैखांदोंमोन।
रायत सभाफोरखौ सांग्रां आरो गोहो गोनां खालामसिननो थाखाय मोनसे मिरुवारि आफाद ‘दुलाराय आसाम रायत सभा’ 1933 मायथाइयाव दानाय जायो। बिदिनो 1934-39 मायथाइनि गेजेराव आसामाव अजायै 300 रायत सभा दानाय जादोंमोन। आयेन मानियि सोमावसारनायनि समाव कंग्रेछ दैदेनगिरिफोरनि नाजानायाव आबादारिफोरा रायत सभानि फिरफिलानि सिङाव ज’ जादोंमोन आरो सोरखारनि हानि खाजोना बांहोनायनि बेरेखायै हेंथा होलांबाय थादोंमोन।
सों 4. ज’रहाट सार्बजनिक सभानि थांखि आरो हाबाफारिनि सोमोन्दै लिर।
फिन : 1884 मायथाइयाव जगन्नाथ बरुवानि दैदेननायाव ज ‘रहात सार्बजनिक सभाखौ गायसननाय जायो। आफादनि गायसनगिरि आफादगिरिया राजा नारायण सिंह एबा माजु मेलीया राजा आरो नेहाथारिया जगन्नाथ बरुवा। बे आफादानो आसामनि गिबि रायजोयारि राजखान्थियारि फसंथान। बे आफादनि गुबै थांखिफोरा जाबाय–
(i) राइजोनि मिजिंथिनाय, लुबैनायनि सोमोन्दै सरखारनो मिथिहोनाय।
(ii) सरखारनि थांखि आरो खान्थिखौ सरसनस्रा सुबुंनो मिथिहोनाय।
(iii) सरासनस्रा सुबुंफोरनि थासारि जौगाखांहोनाय।
बे आफादा थोंजों सोरखारजों मोगा-मोगि जायाखैमोनब्लाबो नाथाय सरखारनि गाज्रि खान्थिनि बेरेखायै गोख्रोङै खोथा बुंदोंमोन। बे बिथिङाव आफाद लानाय माखासे मख ‘जाथाव हाबाफारिफोरखौ गाहायाव मख ‘नाय जावाय–
(i) 1886 मायथाइनि सोरखारनि हा-खाजोना खान्थिनि बेरेखायै गोख्रों हेंथा होदोंमोन।
(ii) 1892-93 मायथाइयाव आफादा आबादारि समाजजों लोगोसे जवै खाजोना बांहोनायनि हेंथा होदोंमोन।
(iii) 1893 मायथाइयाव आफादा राजकीय कानि आय ‘गनि सेराव गांसे गोसोखां बिलाइ होनानै आसामनिफ्राय कानि बाहायनायखौ फारियै फोजोबनो खावलायदोंमोन।
बे ज’रहाट सार्बजनिक आफादा 1905 मायथाइनि बंग सोखावनायखौ गोख्रों हेंथा खालामदोंमोन। सोरखारा जेब्ला आसामखौ सानजा बंगजों सरजाबो अब्ला बे आफादा बे गोदान हादरसायाव असमीया सरासनस्रा सुबुंफोरनि मोनथाइ सरखा खालामनो दाबि खालामदोंमोन। ज’रहाट सार्बजनिक सभाया (आफाद) होरलां-होरथाङैब्लाबो 1921 मायथाइसिम जोरनानै दंमोन।
सों 5. आसाम प्रदेश कंग्रेछ कमिटिनि जोनोम आरो गुबै बिफावनि सोमोन्दै सुंद’ फोरमायथि हो।
फिन : 1885 मायथाइनि दिसेम्बराव भारतारि हारिमायारि कंग्रेछखौ दानाय जादोंमोनब्लाबो 1920 मायथाइसिमहालागि आसामाव हादरारि कंग्रेछ कमिटि दानो हानाय जायाखैमोन। भारतारि हारिमायारि कंग्रेछनि खायसे हाबाफारिफोरखौ आसाम एस’सियेसननानो मावबोदोंमोन। हारिमायारि कंग्रेछनि दैदेननायाव जानाय 1920 मायथाइनि हेफाजाबहोयि सोमावसारनायाव आसाम एस’सियेसना बाहागो लानानै लासे लासै दुलाराय भारतारि राजखान्थिनि फारसे दावगालांदोंमोन।
बिदि खाबुखौ लानो थाखायनो गौथुमनि खावसे दैदेनगिरि मावथिया आसाम एस’सियेसनखौ कंग्रेछनि हादरसायारि कमिटिसिम सोलायनो नाजादोंमोन नाथाय माखासेया बेनि हेंथा होदोंमोन। थेवबो गोबां मावथिफोरानो भारतारि हारिमायारि कंग्रेछनि मावनाय दांनाय एबा आदर्श बिखान्थिजों गोसो बोगथाबजानानै आसाम एस’सियेसनखौ कंग्रेछजों सरजाबनायनि थांखियै 1921 मायथाइनि 18 एप्रिलाव ज’रहाटाव मोनसे जर’खा जथुमा खुंनाय जायो। उनाव बे बोसोरनिनो थामहिनबा 1921 मायथाइनि 5 जुनखालि आसाम हादोरसा कंग्रेछ कमिटिखिौ दानाय जायो। आसाम हादोरसा कंग्रेछ कमिटिनि गिबि आफादगिरिया कुलधर चलिहा आरो नेहाथारिया नबीन चन्द्र बरदलै।
हादरसायारि कंग्रेछ कमिटि दाखांजानायनि उनाव बे कमिटिनि बिफावाबो जोबोद मख ‘थावना। आसाम हादरसा कंग्रेछ कमिटिनि दैदेननायाव 1921 मायथाइयाव महात्मा गान्धीखौ आसामाव हे फाजाबहोयि सोमावसारनायखौ फोस्रावनो लाबोनाय जादोंमोन गान्धीनि आसाम दावबायनाया गोदानै दाजानाय कंग्रेछनि मावथिफोरनि गेजेराव जावरिखांहोदोंमोन।
1926 मायथाइयाव गुवाहाटीनि पाण्डुवाव भारतारि हारिमायारि कंग्रेछनि 41 थि बोसोरसालिया जथुमाखौ आसाम हादोरसा कंग्रेछ कमिटियानो खुंफुंना हरनाय जायो। 1946 मायथाइनि सरासस्रा बिसायखथियाव कंग्रेछ अनजिमा गोबां मोननानै सरखार दायो आरो गिबि गाहाइ मन्थ्रि महरै सायख जायो ग ‘पीनाथ बरदलैया। केबिनेट मिसना आसाम आरो सा सानजाखौ सानजा बंगजों सरजाबनानै ‘ग ग्रुप’आव सोफादेरनो नागिरदोंमोन। नाथाय बरदलैनि दैदेननायाव जानाय सोमावसारनायनि जाउनाव आसामखौ ‘ग ग्रुप’ आव सोफादेरनो हायाखिसै।
सों 6. गावहादरारि सोमावसारनायाव आसामनि बिहोमानि सोमोन्दै लिर।
फिन : लर्ड नेथानियेल कार्जना बंग हादोरखौ खावनै बाहागोआव बोखावनानै बाहागोसेखौ आसामजों सरजाबनानै ‘सानजा बंग आरो आसाम’ मुंनि गंसे हादरसा दायो। बंगखौ खावनै खालामनायनि फिनजाथाय महरै बंग हादरनि सुबुंफोरा गावहादरारि सोमावसारनाय जागायदोंमोन।
आसामनि गिबि रायजोआरि राजखान्थियारि फसंथान ज’रहाट सर्बजनिक सभाया 1905 मायथाइनि बंग सोखावनायखौ गोख्रों हैंथा होदोंमोन।
आसाम एस ‘सियसनाबो बंग सोखावनायनि गो बेरेखा खालामदोंमोन। बंग सोखावनायनि हेंथायै आसामखौ सानजा बंगनिफ्राय जुदा खालामनो 1907 मायथायाव एस ‘सियेसना सोरखारनो गोसोखां बिलाइ होदोंमोन।
बंग सोखावनायनि फिथाय महरै सोमजिनाय गावहादरारि सोमावसारनाया आसामसिमबो गोसारफैदोंमोन। गुबैयै बुरलुंबुथुर हायेनाव बे सोमावसारनायनि गोहोम गोलैदोंमोन। आसामकेशरी अम्बिकागिरि रायचौधुरी आरो ग ‘बिन्द लाहिड़ीया गुवाहाटीनि फरायसाफोरनि गेजेराव बिग्रायारि गौथुम दादोंमोन। बिथांमोना आसामनि जिलाफोराव गाव हादरारि मुवा बाहायनायनि थाखाय फोसावदोंमोन। बे खोथाखौ मिथि मोननानै आसामनि मानसिफोरा संख्रैनि सोलाय खारदै, गुबुन हादोरारि सेनिनि सोलाय बेनारसनि सेनि, गुबुन हादोरारि जिनि सोलाय इन्दि, मुगा, खुन आरो खादी जि बाहायदोंमोन।
गुवाहाटीनि हानजासे फरायसाफोरा जाहाज गाथोनाव खुलिनि खामानि मावनानै खामायनाय रांखौ गावहादोरारि सोमावसारनायनि थुबिलाव हरदोंमोन। अम्बिकागिरिया ‘बन्दिनी भारत ‘मुंनि गांसे बिग्रायारि थुनफावथाइ लिरना सोमावसारनायखौ गोख्रोंसिन खालामनो नाजादोंमोन। 1906 मायथाइनि सेप्टेम्बरखालि आसामनि सोमावसारगिरिफोरा ब्यामफिल्ड फुलांरखौ बुथारनो गुवाहाटी सिलं लामागाव बमा फबदोंमोन। फिथाइ बादियै अम्बिकागिरिखौ 1914 मायथाइसिम बरपेटायाव इसिङारि खाजानाय महरै दोनदोंमोन। बबेखानि बे सोमावसारनायखौ जानगारना लाखिनो थाखाय ब्रिटिस सरकारा सरासनस्रा सुबुंनि मोजांनि थाखाय बुरलुंबुथुर हायेनाव माखासे खामानि मावनो लादोंमोन। ‘सुरमा भेलि एस’ सियेसन ‘नि दैदेननायाव सुरमा सेरफाङावबो बे गावहादरारि सोमावसारनाया बजबजादोंमोन।
सों 7. हेफाजाबहोयि सोमावसारनायाव आसामनि बिफावनि सोमोन्दै लिर।
फिन : भारतनि उदांस्रि सोमावसारनायनि जारिमिनाव हेफाजाबहोयि सोमावसारनाया मोनसे मख’ जाथाव आयदा। बे सोमावसारनाया 1920 मायथाइनिफ्राय 1922 मायथाइसिम सोलिदोंमोन। गान्धीनि गोख्रों दैदेननायाव बे सोमावसारनाया अहिंसा खान्थिजों सालायजादोंमोन। महात्मा गान्धीनि हांख्रायनायाव दुलाराय हादोरा बे सोमावसारनायाव बाहागो लादोंमोन।
नाथाय आसामनिफ्राय आसाम एस ‘सियेसना सोमावसारनायाव बाहागो लांगोन ना लाया थि नाङोमोन। बबेखानि उनाव (1921 मायथाइ) बाहागो लानायनि थिरांथा लायो आरो सोमावसारनायनि मददाव कंग्रेछनि नेम आरो बिथोन मानिना सोलिनो थिरांथायाव फैदोंमोन।
1921 मायथाइयाव महात्मा गान्धीया आसामाव फैनायाव बे सोमावसारनाया जोबोर बजबजादोंमोन। गान्धीनि बिबुंसारनि जथुमायाव आसामनि गोबां मानसिफोरा बाहागो लादोंमोन। गान्धीनि हांख्रायनाय बादियै आसामनि सरासनस्रा सुबुंफोरा गुबुन हादोरारि जि नागारनाय सोमावसारनायाव बाहागो लानानै गुबुनारि जिखौ दामोल खालामनानै सावनानै बेफोरखौ बिदाय होदोंमोन।
चन्द्रनाथ शर्मा, हेमचन्द्र बरुवा, अमियकुमार दास, मुहिबुद्दिन आहम्मेद बायदिया फरायसाफोरखौ दैदेनदोंमोन। बिसोरनि हांख्रायनाय बादियै आसामनि सेंग्राफोराबो सोरखारि फरायसालि गारनानै बे सोमावसारनायाव बाहागो लादोंमोन। बिसोरनि मख’जाथाव बाहागो लागिरिफोरा जाबाय लक्ष्मीधर शर्मा, र ‘हिनी कान्त हातीबरुवा, बिमला कान्त बरुवा, कनक चन्द्र बरुवा बायदि।
नबिन चन्द्र बरदलै, कुलधर चलिहा, तरुन राम फुकन बायदि उकिलफोराबो उकिलगिरि नागारनानै सोमावसारनायाव बाहागो लादोंमोन। गोबां सरखारि साख्रि मावग्रा आरो फोरोंगिरिफोराबो गावबा गाव बिबान एंगारनानै सोमावसारनायाव बाहागो लादोंमोन।
आसामाव बे सोमावसारनाया कानि बाहायनायखौ होबथानायजोंबो जागायदोंमोन। कंग्रेछ मावथि आरो फरायसाफोरा गोख्रोङैकानि बाहायनायखौ बन्द खालामनायनि थाखायनो कानि फाननाया खमायलांदोंमोन आरो बेनि जाउनाव सरखारनि आयाबो हायलांदोंमोन।
साहा बागाननि दांसाफोरनिफ्रायबो बे सोमावसारनाया मदद मोनदोंमोन। थाद थादवैब्लाबो दांसाफोरा माखासे हरताल फालिनायजों लोगोसे खामानि मावालासे थानानै जेंना सोरजिहोदोंमोन।
हेफाजाबहोयि सोमावसारनाया आसामाव खायसे दाथायारिबो खामानि मावदोंमोन। गुवाहाटी, नलबारी, ज’रहाट, तेजपुर, शिबसागर बायदि जायगायाव हारिमायारि सोलोंसालि गायसननाय जादोंमोन। गुवाहाटीयाव गायसनजानाय गिबि हारिमायारि सोलोंथायखुलिया ‘तिलक गोसोखां स्कुल’। गुबुन मोनसे मख ‘जाथाव दाथारिनि खामानिया जादोंमोन खादीनि बाहायनायखौ बयजोंबो बजबजानाय आरो दिहुनथाइखौ बांहोनाय।
सों 8. आयेन मानियि सोमावसारनायाव आसामनि बिफावनि सोमोन्दै लिर।
फिन : भारतनि उदांस्रि सोमावसारनायनि जारिमिनाव आयेन मानियि सोमावसारनाया गान्धीजों दैदेनजानाय नैथि राजखान्थियारि सोमावसारनाय। ब्रिटिस सरकारनि खुंथाइ खान्थिखौ सोलियि खालामनो माखासे थि आयेनफोरखौ मानियियानो बे सोमावसारनायनि थांखिमोन। 1930 माय थाइनि 12 मार्सनि ‘संख्रि सत्याग्रह’ एबा ‘दाण्डि जात्रा ‘जों बे सोमावसारनाया जागायदोंमोन। गान्धीया सा 78 लोगोफोरखौ लाफानानै सवरमती आस्रमनिफ्राय डाण्डिनि लैथो सेरसिम 240 फ्राम माइल गोजान दावबायना ‘संख्रि दिहननानै ‘संख्रि आयेनखौ सिफायदोंमोन। गोख्रै बे सोमावसारनाया गासै हादरावनो गोसारो।
आसामाव हेमचन्द्र बरुवा, महम्मद तेयाबुल्ला, विष्णुराम मेधि, अम्बिकागिरि रायचौधुरीमोननि दैदेननायाव गुवाहाटीनि जर्ज गेलेग्राफोथाराव बयबो ज’ जानानै गान्धीनि संख्रि सत्याग्रहनि फारसे गनायथि होदोंमोन। गान्धीनि दाण्डि जात्रायाव आसामनि फ्राय लीलाधर बरुवाया बाहागो लादोंमोन। बबेखानि लाहोर कंग्रेछनि थिरांथायाव गोरोबनो हायिनि थाखाय हादोरसा कंग्रेछ दैदेनगिरि तरुणराम फुकन, र ‘हिनि कुमार चौधुरी, नबीन चन्द्र बरदलै मोनबादिया आयेन मानियि सोमावसारनायनिफ्राय आनज्रायना थादोंमोन। बेबादि थामिनाव कंग्रेछखौ गोख्रों खालामनाया गोनांथार जाना फैदोंमोन। बिष्णुराम मेधी, महम्मद तौयाबुल्ला आरो अम्बिकागिरि रायचौधुरी मोनहा कंग्रेछनि गौथुमारि खामानिखौ दैदेनदोंमोन। सोमावसारनायनि बिथिंखौ नायनो गोबां ‘गोदान कमिटि आरो लेङाइ कमिटि’ दानाय जादोंमोन।
अमिय कुमार दासबादि सेंग्रा दैदेनगिरिया फरायसाफोरखौ सोमावसारनायाव बाहागो लानो खावलायदोंमोन। नाथाय फरायसाफोरनि बाहागो लानाया गोसो गोजोनथाव नाङामोन। बबेखानि बै समनि आसामनि सोलोंथाइगोरा जन रिसार्ड कानिंहामनि फोसावनाय। ‘कानिंहाम सार्कुलारा’ फरायसाफोरखौ सोमावसारनायाव बाहागो लानोसो बाध्य खालामदोंमोन। कानिंहाम सार्कुलारा फरायसाफोरखौ सोमावसारनायाव बाहागो लायिनिसोमोन। नाथाय फरायसाफोरा फरायसालि नागारनानै सोमावसारनायाव बारसोमदोंमोन। जाउनाव आसामाव आयेन मानियि सोमावसारनाया गोसारदोंमोन।
आसाम छात्र सन्मिलना गावसिनि बिखान्थि आरो हाबाफारिनि सोमोन्दै सावरायनो थाखाय गुवाहाटीयाव मोनसे जरखा आफाद खुङो। बिसोर बे आफादनि जोहै सोरखारि सोलोंसालिफोरखौ गारनायनि थिरांथा लायो। जाउनाव 1930 मायथाइनि जुलाय आरो आगष्ट दानाव सा 15, 186 फरायसाफोरनि सा 3117 फ्राम फरायसाफोरा सोलोंसालि नागारदोंमोन। फरायसाफोरा कानि आरो जौनि दखान बन्द खालामनाय जादोंमोन। 50 जौखौन्दो हानि खाज ‘ना खमायनायनि दाबिजों आबादारिफोरखौबो सोमावसारनायाव सरजाबदोंमोन।
सों 9. आसामाव भारत एंगारनाय सोमावसारनायनि हाबाफारि आरो गोहोमनि सोमोन्दै मोनसे फोरमायथि लिर।
फिन : भारतनि उदांस्रि सोमावसारनायाव भारत एंगारनाय सोमावसारनाया मोनसे मंख ‘जाथाव खोन्दो। गान्धी आरो कंग्रेछ हानजानि गुबुन दैदेनगिरिफोरनि गोसोयाव साननाय फैदोंमोनदि भारताव ब्रिटिसफोरनि थामोनथाया जापानीफोरखौ भारत गाग्लोबनो थुलुंगा होगोन। गाहायै जेब्ला क्रिपस मिसननि बिथांखियाव दावहानि उनाव भारतनि ‘आबु उदांस्रि ‘नि खोथा गैयामोन अब्लानो हारिमायारि कंग्रेछा 1942 मायथाइनि 8 आगष्ट खालि ‘भारत एंगारनाय सोमावसारनाय’ फोसावदोंमोन। गान्धीया गावनि गोख्रों बिबुंथि ‘मावगोन नङाबा थैगोन’ स्ल’गानजों सरासनस्रा सुबुंफोरखौ हांख्रायदोंमोन। बे सोमावसारनायाव गासै हादरनि सुबुंफोरा गोसो दुखांनानै बाहागो लादोंमोन।
भारतनि गुबुन गुबुन जायगानि बादि आसामनि कंग्रेछ मावथि आरो सरासनस्रा सुबुंफोरा बे भारत एंगारनाय सोमावसारनायाव बारसोमदोंमोन। सोमावसानायखौ सरखारनि दबथायनाय आरो दैदेनगिरिफोरखौ खानानै जेलाव थिसन हरनायफोरा सोमावसारनायखौ गोख्रोंसिनसो खालामदोंमोन। गिबियाव आसामाव बे सोमावसारनाया अहिंसा खान्थिजों हरताल, पिकेटिं, हान्जादिंनाय आरो सुबुं गौथुमनि गेजेरजों जागायजेनदोंमोन। नाथाय जेब्ला जेलाव थानाय दैदेनगिरिफोरनि सायाव पुलिसनि साजाया बांद्राय जालांदोंमोन अब्ला सोमावसारनाया हिंसायारि महर लादोंमोन।
सरखारि न ‘बां-जेरै डाक बांला, पुलिस थाना, सरखारि मावख ‘सालिफोर बादिखौ फोजोबस्रांनाय, रेललामा आरो रेलगारि खोलैनाय, मिलिटारिनि हाथियार रोगानाय लामा गाज्रि खालामना होनाय, टेलिफन आरो टेलिग्राफनि लाइन दानस’ना होनाय बायदि हिंसायारि हाबाफारि लानाय जादोंमोन। मुंथियै नगाव आरो दरं जिलायाव सोरखारि न बां बुफायनाय जादोंमोन। हबिगन्जनि साहाबि बाजार, ग’लाघाट बरपथार, कामरुपनि पानबारि, रडिया आरो शिबसागरनि चाफ्रायाव रेल खोलैनाय खामानि मावनाय जादोंमोन।
ब्रिटिस सरखाराबो बे सोमावसारनायखौ दबथायनो नाजादोंमोन। दायगैयि मानसिफोराबो पुलिसनि साजा मोनदोंमोन आरो कंग्रेछनि दैदेनगिरिफोरखौ बाहेरा मुलुगजों सोमोन्दो लाखिनो मोनि खालामदोंमोन। बरपथाराव रेल खोख्लैनायनि दायाव कुशल क’वरखौ फासि होनाय जादोंमोन। आसामनि दाब दाब जायगायाव पुलिसनि गुलि गावनायाव खमैबो सा’ 27 मानसि मुंख्लं जादोंमोन। गोबां मानसि जेल जानांदोंमोन। गहपुरनि पुलिस थानायाव फिरफिला दैखांनो थांनायाव 14 बैसोनि सिख्लासा कनकलता बरुवाया पुलिसनि गुलियाव थैनांदोंमोन।
भारत एंगारनाय सोमावसारनाया थारै मोनसे गिदिर सोमावसारनाय। साम्राज्यबादि ब्रिटिस सरखारा गोबां दैदेनगिरिफोरखौ नैथि मुलुग दावहा जोबनायालासि जोबथेना दोनदोंमोन। बबेखानि जेलनि बाहेराव थानाय माखासे दैदेनगिरिफोरा थाखुमानानै थाना सोमावसारनायखौ दैदेनलांनो नाजादोंमोन। आसामाव थाखुमानानै गौथुमनि दैदेननाय बिबानखौ लादोंमोन शंकरचन्द्र बरुवा, महेन्द्र नाथ हाजरिका, ज्य ‘तिप्रसाद आगरवाला, लक्ष्मी प्रसाद ग ‘स्वामी, ब्रजनाय शर्मा आरो गहन चन्द्र ग ‘स्वमीमोनहा 1943 मायथाइयाव बजाली ओनसलावनो मोन 32 थाखुमारि गौथुमनि खुलि गायसननाय जादोंमोन।
ब्रिटिसनि समानै सरखार दानायाबो खायसे दैदेनगिरिफोरनि गुबै हाबोमोन। आसामनि बजाली, ढकुवाखाना, रहा, जामुगुरि, बाहजानी बायदि जायगायाव सोमावसारग्राफोरा गामि पन्सायत दानानै जायगारि खुंथाइ गामिफोरनि आखाइयाव दैखांना होदोंमोन। बे सोमावसारनाया फेलें जानायाव गोबां हारिमायारि दैदेनगिरिफोरा गोसो बायदोंमोन।
सों 10. बरदलै मन्थ्रि आफाद दैदेननायाव आसामाव गायसन जानाय सोलोंसालिफोरनि सोमोन्दै लिर।
फिन : 1946 मायथाइनि 11 फेब्रुवारियाव आसामाव ग ‘पीनाथ बरदलैनि दैदेननायाव कंग्रेछ हानजाया मन्थ्रि आफाद दायो। गाहाइ मन्थ्रि (उनाव गिबि मन्थ्रि ) बरदलैनि मन्थ्रि आफादा हादर उदांस्रि मोननायनि उनाव गोबां जेंनाजों मोगो मोगि जानांगौ जादोंमोन। थेवबो बिथांनि मन्थ्रि आफादनि दैदेननायाव आसामाव गायसनजानाय सोलोंसालिफोरनि सोमोन्दै सुंद ‘वै सावरायनाय जाबाय।
(क) आसाम आबाद मुलुग सोलोंसालि : करिमगन्ज आरो तिताबराव गायसनजानाय आबाद बिजिरसं खुलियानो आसाम आबाद मुलुगसोलोंसालि गायसननायनि जागायजेननाय बुंनो हायो। बे खुलिफोरनि बिजिरसं आरो ट्रेइनिंफोरनिफ्राय मोनथिना मोनदोंमोनदि आबाद आरो जुनार कलेजनि आलादा आलादा फसंथान नांगौ। बेखौ नोजोर होनानैनो 1948 मायथाइयाव नगावाव आसाम जुनार कलेज आरो ज’रहाटाव आसाम आबाद कलेज गायसननाय जायो। बे गंनै कलेजखौ लाफानानै 1969 मायथाइयाव ज’रहाटाव आसाम आबाद मुलुगसोलोंसालि गायसननाय जायो आरो जुनार फाहामग्रा कलेजखौ नगावनिफ्राय गुवाहाटीनि खानापारासिम दोरोदहोनाय जायो।
(ख) गौहाटी (गुवाहाटी) मुलुगसोलोंसालि : गौहाटी मुलुगसोलोंसालिया जाबाय-सा-सानजा भारतनि बयनिख्रुइबो गोजामसिन आरो गिबि रायजोआरि मुलग सोलोंसालि। बे मुलुगसोलोंसालिखौ 1948 मायथाइनि 26 जानुवारिखालि गायसननाय जायो। 1917 मायथाइयावनो कलिकता मुलुग सोलोंसालि आय ‘गनि आफादगिरि सार माइकेल सेडलारा गुवाहाटी एबा आसामाव गोरलैयैनो मुलुग सोलोंसालि गायसननो हानायनि बाथ्रा बुंखादोंमोन। बै बोसोरनिनो दिसेम्बर दानाव शिबसागराव खुंजानाय आसाम एस ‘सेयेसननि बोसोरारि आफादाव गंसे मुलुग सोलोंसालिनि थाखाय रायजोफोरा दाबि दैखांदोंमोन।
उनाव सरखारा ड० सुर्य कुमार भुञाखौ जर ‘खा मावगिरि महरै थिसननानै 1946 मायथाइयाव नांगौबादि खारिथि (तथ्य) बुथुमनो आरो जायगा नागिरनो होदोंमोन। आसाम सरखारनि गुवाहाटी मुलुग सोलोंसालि नेमखान्थि 1947 नि सिङाव 1948 मायथाइयाव गुवाहाटी मुलुग सोलोंसालिखौ गायसननाय जायो। गायसननाय समाव बिनि सिङाव गं 17 कलेज आरो मोन दाइन (8) बिफान दंमोन। नोगोरमा मिरुनिफ्राय हाबाफारि जागायनाय मुलुग सोलोंसालिया उनाव 1955-56 मायथाइयाव दानि जालुकबारिनि केम्पासाव लाबोनाय जायो। आथिखालाव मुलुग सोलोंसालिनि केम्पासखौ ग ‘पीनाथ बरदलै नोगोर मुङै मिथिजाबाय।
(ग) आसाम देहाफाहामग्रा कलेज : ड० जन बेरी ह ‘वाइटनि रां अनसुंथाइजों 1900 मायथाइयाव डिब्रुगड़ाव ‘बेरी ह ‘वाइट मेडिकेल स्कुल’ गायसननाय जादोंमोन। नैथि मुलुग दावहानि उनाव बे मेडिकेल स्कुलखौ खाथिनिनो देहाफाहामसालिनि केम्पासाव लानानै थांदोंमोन आरो बेखौ दावहानि समाव आमेरिकानि सान्थ्रिफोरा बाहायदोंमोन। हादोरा उदांस्रि मोननायनि उनाव 1947 मायथाइनि 3 नबेम्बरखालि बे स्कुलखौ फसंथानारियै ‘आसाम देहाफाहामसालि कलेज’ मुं होनाय जायो। देहाफाहामनाय आरो देहाफाहामनाय सोलोंथाइनि गोनांथिनि फारसे नोजोर होनानै गोदानै देहाफाहामसालि कलेज गायसननायनि गोनांथिया गोख्रों जानानै फैदोंमोन।
1959 मायथाइयाव राइजो सरकारा नैथि देहाफाहामग्रा कलेज गायसननायनि लाहार फाहार खालामदोंमोन। उनाव सरखारा गुवाहाटी आरो शिलचराव गंनै देहाफाहामसालि कलेज गायसननायनि थिरांथा लायो। बे थिरांथा बादियै 1960 मायथाइनि 20 सेप्टेम्बरखालि गुवाहाटी देहाफाहामसालि कलेजखौ फसंथानारियै बेखेवनाय जायो आरो 1968 मायथाइयाव शिलचर देहाफाहामसालि कलेजखौ गायसननाय जायो।
उफ्रा सोंनाय फिननाय
गुसुं फिननायनि सोंनायः
सों 1. इयाण्डाबु गोरोबथाया माब्ला जादोंमोन?
फिन : इयाण्डाबु गोरोबथाया 1826 मायथाइनि 24 फेब्रुवारिखालि जादोंमोन।
सों 2. इयाण्डाबु गोरोबथाया सोर सोरनि गेजेराव जादोंमोन?
फिन : इयाण्डाबु गोरोबथाया इंराज आरो बार्मिजफोरनि गेजेराव जादोंमोन।
सों 3. 1857 मायथाइयाव आसामनि सोर सोर ज्ञानप्रदायिनी आफाद गायसनदोंमोन?
फिन : आनन्दराम ढेकियाल फुकन आरो गुणाभिराम बरुवा।
सों 4. ‘असमीया लिटारेरी ससाइटि’ खौ सोर सोरनि दैदेननायाव दाजादोंमोन?
फिन : देबीसरन बरुवा आरो गुण ग ‘बिन्द फुकन।
सों 5. ज’नाकी लाइसिनि गिबि सुजुगिरिया सोर?
फिन : चन्द्रकुमार आगरवाला।
सों 6. आसाम फरायसा सन्मिलना माब्ला गायसन जादोंमोन?
फिन : 1916 मायथाइ।
सों 7. आह ‘म सभानि नेहाथारि महरै सोर 40 बोसोरफ्राम दोंमोन?
फिन : पद्मनाथ ग ‘हाइ बरुवा।
सों 8. ज’रहाट सार्बजनिक सभानि मोनसे थांखि लिर।
फिन : ज’रहाट सार्बजनिक सभानि मोनसे थांखिया जाबाय-रायजोनि मिजिंथिनाय, लुबैनायनि सोमोन्दै सोरखारनो मिथिहोनाय।
सों 9. आसाम एस ‘सियेसननि गिबि आफादगिरिया सोर?
फिन : आसाम एस ‘सियेसननि गिबि आफादगिरिया राजा प्रभात चन्द्र बरुवा।
सों 10. हारिमायारि कंग्रेछ माब्ला गायसन जादोंमोन?
फिन : 1885 मायथाइ, दिसेम्बर।
सों 11. आसाम हादरसा कंग्रेछ कमिटिनि गिबि आफादगिरि आरो नेहाथारिया सोर?
फिन : आसाम हादरसा कंग्रेछ कमिटिनि गिबि आफादगिरिया कुलधर चलिहा आरो नेहाथारिया नबीन चन्द्र बरदलै।
सों 12. आसाम केशरी सोरखौ बुंनाय जायो?
फिन : अम्बिकागिरि रायचौधुरी।
सों 13. ‘बन्दिनी भारत’ मुनि बिग्रायारि थुनफावथाइखौ सोर लिरदोंमोन?
फिन : ‘बन्दिनी भारत’ मुंनि बिग्रायारि थुनफावथाइखौ अम्बिकागिरि रायचौधुरीया लिरदोंमोन।
सों 14. गान्धीनि ‘संख्रि सत्याग्रह’ एबा दाण्डिजात्रायाव आसामनिफ्राय सोर बाहागो लादोंमोन?
फिन : लीलाधर बरुवा (बै समाव कलिकता सि.टि. कलेजनि फरायसा)
सों 15. आसाम हादरसा कंग्रेछ कमिटिनि फसंथानारियै सायख ‘जानाय गिबि आफादगिरिया सोरमोन?
फिन : बिष्णुराम मेधी।
सों 16. गोदानै दाजानाय ‘सानजा बंग आरो आसाम’ हादरसानि गबर्णर मासियाव सोर थिसनजादोंमोन।
फिन : गोदानै दाजानाय ‘सानजा बंग आरो आसाम’ हादरसानि गबर्णनर महरै ब्यामफिल्ड फुलारखौ थिसननाय जादोंमोन।
सों 17. इंराजा फोसावनाय गोदानारि सोलोंथाइया भारतारि समाजाव खोलैनाय मोननै गोहोम लिर।
एबा
भारताव इंराजा फोसावनाय गोदानारि सोलोंथाइनि मोननै फिथाइ लिर।
फिन : इंराजा फोसावनाय गोदानारि सोलोंथाइया भारतारि समाजाव खोलैनाय मोननै गोहोमा जाबाय–
(i) गोदानारि सोलोंथाइया भारतारि मानसिफोरखौ गावसोरनि हारियारियै सोलि बोनाय दोरोंफोरखौ मोनसे सावरायथाइयारि नोजोरजों बिजिरना नायनो गोसो थुलुंगा होदोंमोन।
(ii) बे सोलोंथाया 19 जौथाइनि जोबनायथिं भारतबर्षयाव मोनसे हारियारि सांग्रांथि जावरिखां होनायाव बिहोमा जगायदोंमोन।
सों 18. भारताव इंराजी सोलोंथाइ फोसावनायनि (बाहायनायनि) मोनथाम फिथाय लिर।
फिन : भारताव इंराजी सोलोंथाइ फोसावनायनि मोनथाम फिथाइया जाबाय–
(i) इंराजी सोलोंथाइया भारतारिफोरखौ सोनाबारि गोदान साननाय ह’नायजों सिनायथि खालामनानै होयो।
(ii) मोगथां जुक्तियारि साननाय ह ‘नाया भारतारि समाजनि गाज्रि फोसाबनाय आरो खोमसि फोथायनायफोरखौ जानगार होनायाव हेफाजाब होयो।
(iii) बेयो भारतारिफोरनि गोसोआव गोदान जावरिखांनाय सोमजिहोनायाव हेफाजाब होयो।
सों 19. ‘असमीया लिटारेरि स ‘साइटि ‘खौ माब्ला गायसननाय जादोंमोन आरो बेनि गाहाइ थांखिया मा?
फिन : ‘असमीया लिटारेर स’साइटि ‘खौ 1872 मायथाइयाव गायसननाय जादोंमोन। बेनि गाहाइ थांखिया जाबाय थुनलाइ सर्सा खालामनाय।
सों 20. 1872 मायथाइयाव ‘असमीया लिटारेरी स ‘साइटि’ नि जानानै भाइसरय लर्ड नर्थब्रुकनो गोसोखां लाइनि मोननै दाबि रायखां।
फिन : 1872 मायथाइयाव असमीया लिटारेरी ससाइटिनि जानानै नर्थब्रुकनो होनाय गोसोखांलाइनि मोननै दाबिया जाबाय–
(i) आसामनि मिथिंगायारि सम्पद जौगाहोनाय।
(ii) आसाम आरो बंगनि गेजेराव रेल सालायहोनो थाखाय नांगौबादि राहा लानाय।
सों 21. ज ‘नाकी लाइसिखौ माब्ला बबेयाव दिहुननाय जादोंमोन?
फिन : ज’नाकी लाइसिखौ 1889 मायथाइयाव कलिकतायाव दिहुननाय जादोंमोन।
सों 22. ज’नाकी लाइसिनि मोनथाम बिहोमानि सोमोन्दै लिर।
फिन : ज’नाकी लाइसिनि मोनथाम बिहोमाया जाबाय–
(i) ज’नाकीया बै समनि गोबां गोदान थुनलाइयारि हारोंथाइ गोनां सुबुंफोरखौ दिहुनना लाबोनो हादोंमोन।
(ii) ज’नाकीयाव फोसावजानाय लिरबिदांफोराव लिरगिरिनि हारियारिबादि साननाय हनाय बेरखांहोदोंमोन। बे हारियारिबादि साननाय सुबुंफोरखौ जावरिखां होनायाव थुलुंगा होदोंमोन।
(iii) ब्रिटिस फैनायनि जाहोनाव आसामनि जायगायारि उद्य’ग आरो फालांगियाव जा उलथा गोहोम गोलैदोंमोन बेनि सोमोन्दै ज’नाकीया सांग्रां खालामना होदोंमोन।
सों 23. आसाम छात्र सन्मिलन माब्ला गायसननाय जादोंमोन आरो बेनि गिबि जथुमायाव सोर आफाद दैदेनदोंमोन?
फिन : ‘आसाम छात्र सन्मिलन ‘खौ 1916 मायथाइयाव गायसननाय जादोंमोन आरो बे सन्मिलननि गिबि जथुमायाव आफाद दैदेनदोंमोन लक्ष्मीनाथ बेजबरुवाया।
सों 24. 19 जौथाइनि जोबनायथिं आसामाव गायसनजानाय मोननै रायत सभा (आफाद)नि मुं लिर।
फिन : 19 जौथाइनि जोबनायथिं आसामाव गायसनजानाय मोननै रायत समाया जाबाय–
(i) तेजपुर रायत सभा आरो
(ii) नगाव रायत सभा।
सों 25. रायत सभानि मोनथाम थांखि लिर।
फिन : रायत सभानि मोनथाम थांखिया जाबाय–
(i) ग्रेजिं खाजोना बन्द खालामनाय।
(ii) हानि खाजोना खमायनाय।
(iii) सानजा बंगनिफ्राय हाबफैनायखौ होबथानाय।
सों 26. आह ‘म सभाखौ सोरनि दैदेननायाव गायसननाय जादोंमोन आरो बे सभानि गिबि जथुमाया बबे जिलायाव खुंजादोंमोन?
फिन : आह ‘म सभाखौ पद्मनाथ ग’हाइ बरुवानि दैदेननायाव 1893 मायथाइयाव गायसननाय जादोंमोन आरो बेनि गिबि जथुमाया शिबसागर जिलायाव खुंजादोंमोन।
सों 27. आह’म सभाखौ माब्ला ‘दुलाराय आसाम आह’म एस’सियेसन’ मुं होनाय जादोंमोन आरो बेनि मोनसे मख’जाथाव राजखान्थियारि बिख’थाय (दाबि) लिर।
फिन : आह’म सभाखौ 1910 मायथाइयाव ‘दुलाराय आसाम आह’म एस’सियेसन’ मुं होनाय जायो। बे एस ‘सियेसननि मोनसे मख’जाथाव दाबिया (बिख’थाय) जाबाय आह’मफोरखौ सरखारियै अनजिमा बाङाइ महरै गनायनानै बिसोरनि थाखाय बिधान सभायाव मासि (आसन) थिखानाय आरो जुदा समष्टि दानाय।
सों 28. ज’रहाट सार्बजनिक सभानि मोनथाम गुबै थांखि मख’।
फिन : ज’रहाट सार्बजनिक सभानि मोनथाम गुबै थांखिया जाबाय–
(i) रायजोनि मिजिंथिनाय, लुबैनायनि सोमोन्दै सरखारनो मिथिहोनाय।
(ii) सरखारनि थांखि आरो खान्थिखौ सरासनस्रा सुबुंनो मिथिहोनाय।
(iii) सरासनस्रा सुबुंफोरनि थासारि जौगाहोनाय।
सों 29. आसाम एस’सियेसननि मोननै हाबाफारि लिर।
फिन : आसाम एस’सियसननि मोननै हाबाफारिया जाबाय–
(i) पौरसभानि सोरखारि मावथि आरो लोकेल बर्डाव साहा आबादारिफोरनि गादबनायनि बेरेखा खालामनाय।
(ii) एस’सियेसना जायगानि कमिटिफोरनि फोरजाखान्थियारि खालामनायनि दाबि दैखांनाय।
सों 30. आसाम एस’सियसना ब्रिटिस सरखारनो खालामनाय मोनब्रै दाबि रायखां।
फिन : आसाम एस’सियेसना ब्रिटिस सरखारनो खालामनाय दाबिफोरा जाबाय–
(i) बंग सोखावनायनि हेंथायै आसामखौ सानजा बंगनिफ्राय जुदा खालामनो सरखारनो गोसोखां बिलाइ होनाय।
(ii) बिधान सभायाव थान्दै हरनायनि दाबि दैखांनाय।
(iii) 1918 मायथाइनि मण्टेग’ सेमसफर्ड रिपर्टनि थांखिनाय खुंथाइ सोदांनायाव आसामखौ सरजाबफानो दाबि दैखांनाय।
(iv) 1920 मायथाइयाव आसामाव मुलुग सोलोंसालि गायसननो दाबि दैखांनाय।
सों 31. आसामाव गिबियै गायसनजानाय मोननै राजखान्थियारि फसंथाननि मुं लिर।
फिन : आसामाव गिबियै गायसनजानाय मोननै राजखान्थियारि फसंथाननि मुङा जाबाय–
(i) ज’रहाट सार्बजनिक सभा आरो
(ii) आसाम एस’सियेसन।
सों 32. भारतारि हारिमायारि कंग्रेछनि 41 थि बोसोरसालिया जथुमाया माब्ला आरो बबेयाब खुंजादोंमोन?
फिन : भारतारि हारिमायारि कंग्रेछनि 41 थि बोसोरसालिया जथुमाया 1926 मायथाइयाव गुवाहाटीनि पाण्डुवाव खुंजादोंमोन।
सों 33. ब्रिटिस सरखारा बुरलुंबुथुर हायेननि थाग्राफोरखौ गावहादरारि सोमावसारनायनिफ्राय जानगारनो लाखिनो थाखाय सुबुंनि मा मा मोजां खामानि फोसावदोंमोन?
फिन : ब्रिटिस सोरखारा बुरलुंबुथुर हायेननि थाग्राफोरखौ गावहादरारि सोमावसारनायनिफ्राय जानगारना लाखिनो थाखाय फोसावजानाय खामानिफोरा जाबाय–
(i) असमीया राव थुनलाइखौ कलिकता मुलुगसोलोंसालिनि एनट्रेन्स आनजादनि फराफारियाव सोसननाय।
(ii) कटन कलेजखौ जौगा माननि सोलोंथाइ फसंथान महरै गायसननो थाखाय गासैबो बिफानावनो बि.ए. थाखो खुलिनाय।
(iii) बुरलुंबुथुर हायेनाव मौजादार खान्थि सालायफिननाय।
(iv) नैजिफारियारि हा-बन्द ‘वस्ति बाहायनाय।
सों 34. आसामाव हेफाबहोयि सोमावसारनायनि मोननै गोहोम मख’।
फिन : आसामाव हेफाजाबहोयि सोमावसारनायनि मोननै, गोहोमा जाबाय–
(i) कानि बाहायनाय बन्द जानाय।
(ii) खादीनि जि बाहायनाय आरो बेनि दिहुननाय बांहोनाय।
सों 35. आसामाव हेफाजाबहोयि सोमावसारनाय दैदेननाय साब्रै सुबुनि मुं लिर।
फिन : आसामाव हेफाजाबहोयि सोमावसारनाय दैदेननाय साब्रै सुबुंफोरनि मुंआ जाबाय–
(i) चन्द्र नाथ शर्मा,
(ii) अमिय कुमार दास।
(iii) हेमचन्द्र बरुवा।
(iv) मुहिबुद्दिन आहमेद।
सों 36. आसामाब आयेन मानियि सोमावसारनायनि बिथिंखौ नायनो थाखाय दानाय गोदान कमिटिफोरनि मोनब्रै थांखि रायखां।
फिन : आसामाव आयेन मानियि सोमावसारनायनि बिथिंखौ नायनो थाखाय दानाय गोदान कमिटिफोरनि मोनब्रै थांखिया जाबाय–
(i) रांखावरिनि थुबिल बांहोनाय।
(ii) सोबख’नाय आरो दबथायनाय आयेन बिथोननि हेंथा होनाय।
(iii) गुबुन हादरारि मुवा बेसाद गारनाय।
(iv) कानि आरो जौ बाहायनायनि बेरेखायै हेंथा होनाय।
सों 37. ‘कानिंहाम सार्कुलारा’ मा? बे सारकुलारनि रादाया मा?
फिन : ‘कानिंहाम साकु’लारा’ मोनसे फोसावलाइ। बे सार्कुलरखौ (फोसावलाइ) आयेन मानियि सोमावसारनाय सोलिबाय थानाय समाव आसामनि बै समनि सोलोंथाइ गोरा जन रिसार्ड कानिंहामा होदोंमोन। बे सार्कुलारखौ कानिंहामा होनायखाय बिथांनि मुङै’ कानिंहाम सार्कुलार’ बुंनाय जायो। बे सार्कलारनि रादाया जाबाय–
(i) फरायसा आरो बिसोरनि बिमा बिफाफोरा जायखिजाया राजखान्थियारि हाबाफारियाव बाहागो लाया होननानै लिरनाय महराव खोथा होनाय।
(ii) दायनिगिरि जानायफोरखौ खना (जरिमाना) फोनांनायजों लोगोसे फरायसा बृत्ति (scholarship) खौ बन्द खालामनाय।
सों 38. बरदलै मन्थ्रि आफाद उदांस्रिनि उनावनो मोगा मोगि जानांनाय मोनब्रै जेंना मख’।
फिन : बरदलै मन्थ्रि आफादा उदांस्रिनि उनावनो मोगा मोगि जानांनाय मोनब्रै जेंनाया जाबाय–
(i) सा-सानजा ओनसोलनि सिमा जेंना।
(ii) सा- सानजा भारतनि हानथा मेलानि जेंना।
(iii) रांखान्थियारि बेले बेजेनि मोगा मोगि जानाय।
(iv) सा-सानजा भारतनि गुबुनारि हाबफैनाय जेंना।
सों 39. आसाम आबाद मुलुगसोलोंसालिनि मोनथाम थांखि लिर।
फिन : आसाम आबाद मुलुगसोलोंसालिनि मोनथाम थांखिया जाबाय–
(i) आबाद खोन्दोआव सुबुं सम्पद जौगाहोनाय।
(ii) दिहुननाय बांहोनो थादवाजासे बिजिरसंनाय।
(iii) बिरोंदामि बिद्यानि जौगाखांहोनाय आरो रायजोनो मिथिहोनाय।
सों 40. बरदलै मन्थ्रि आफादा उदांस्रिनि उनावनो लानाय मोननै गाहाइ थांखि लिर।
फिन : बरदलै मन्थ्रि आफादा उदांस्रिखिनि उनावनो लानाय मोननै गाहाइ थांखिया जाबाय–
(i) हादरसानि इसिं दाथायारि दानायाव गोसो होनाय।
(ii) सुबुं सम्पद जौगा होनाय।
गोलाउ फिननायनि सोंनाय
सों 1. भारतनि उदांस्रि सोमावसारनायाव 1920 मायथाइनिफ्राय 1942 मायथाइसिम आसामनि बिहोमानि सोमोन्दै सावराय।
फिन : भारतनि उदांस्रि सोमावसारनायाव 1920 मायथाइनिफ्राय 1942 मायथाइसिम आसामनि बिहोमाखौ गाहायाव सावरायनाय जाबाय–
(i) हेफाजाबहोयि सोमावसारनाय : 1920 मायथाइयाव गान्धीनि हांख्रायनाय बादियै आसामावबो हेफाजाबहोयि सोमावसारनाय जागायो। आसामाव कंग्रेछ कमिटि गैयिलाय आसाम एस ‘सियसनानो गिबि गिबि बाहागो लादोंमोन। आसामाव हेफाजाबहोयि सोमावसारनायखौ चन्द्रनाथ शर्मा, अमियकुमार दास, हेमचन्द्र बरुवा, महिबुद्दिन आहमेद तरुणराम फुकन आरो नबीन चन्द्र बरदलै मोनहा दैदेनदोंमोन।
(ii) पाण्डु कंग्रेछ : आसामाव 1921 मायथाइयाव आसाम हादोरसा कंग्रेछ कमिटिखौ दानाय जायो। बे हादोरसा कंग्रेछ कमिटिनि हांख्रायनाय बादियै 1926 मायथाइयाव भारतारि हारिमायारि कंग्रेछनि 41 थि बोसोरसालिया जथुमाया गुवाहाटीनि पाण्डुयाव खुंजायो। बे जथुमाया आसामाव हारिमायारि, सोमावसारनायखौ गोख्रों खालामो।
(iii) साइमन कमिछन : 1927 मायथाइयाव साइमन कमिछन दानाय जादोंमोन। भारतनि गुबुन जायगानि बादि आसमावबो कमिसनखौ नेवसिदोंमोन। सरकारा खुद्रिग्राफोरनि सायाव इनाय बाहायदोंमोन।
(iv) आयेन मानियि सोमावसारनाय : 1930 मायथाइनि 12 मार्सखालिनिफ्राय हादोरनाडैनो आयेन मानियि सोमावसारनाया जुरियो। गान्धीया सबरमती आस्रमनिफ्राय दाण्डिनि लैथो सेरसिम 240 माइल फ्राम गोजान दावबायना लैथोनि दैखौ फुटुंनानै संख्रि दिहुनना संख्रि आयेन सिफायदोंमोन।
गान्धीनि बे दाण्डिसिम दावबायनायाव आसामनि लीलाधर बरुवाया बाहागो लादोंमोन। आसामाव बे आयेन मानियि सोमावसारनायखौ हेमचन्द्र बरुवा, महम्मद तैयाबुल्ला, बिष्णुराम मेधी आरो अम्बिकागिरि रायचौधुरी मोनहा दैदेनदोंमोन। बेवहाय तरुणराम फुकन, र’हिनी कुमार चौधुरी, नबीन चन्द्र बरदलै बायदि दैदेनगिरिफोरा आयेन मानियि सोमावसारनायनि फारसे गोसो गैयामोन।
(v) कानिंहाम सार्कलार : आसामनि सोलोंथाइ गोरा कानिंहामा फरायसाफोरखौ राजखान्थियाव बाहागो लानायनिफ्राय जानगारना लाखिनो थाखाय मोनसे सार्कुलार दिहुनो। बेनि हेंथायाव गोबां फरायसाफोरा सोरखारि स्कुल कलेज नागारनानै बे सोमावासारनायाव बारसोमो आरो हारिमायारि गायसननाय फरायसालियाव मुं थिसनो।
(vi) भारत एंगारनाय सोमावसारनाय : 1942 मायथाइनि 8 आगष्टखालि ‘भारत एंगारनाय’ बिथांखिया नाजावजायो। गान्धीजों लोगोसे कंग्रेछनि सिगां सिरिनि दैदेनगिरिफोरखौ खानायाव बे सोमावसारनाया सुबुं सोमावसारनायाव सोलाय जायो। आसामाव ग’पीनाथ बरदलैजों लोगोसे सिगांसिरिनि दैदेनगिरिखौ सोरखारा खायो। पुलिस मिलितारीया सोमावसारनायखौ दबथायनो बाइदि इनाय उदखारनि मावफारि लायो। बरपथाराव रेल खोख्लैनायनि दायाव कुशल क’ वरखौ फासि होना बुथारदोंमोन। गहपुरनि थानायाव फिरफिला दैखांनो थांनायाव 14 बैसोनि कनकलता बरुवाया पुलिसजों गावथार जायो।
| SL No. | CONTENTS |
| Unit – 1 | जारिमिन |
| Chapter – 1 | बंग सोखावनाय (1905-1911) आरो गावहादरारि सोमावसारनाय |
| Chapter – 2 | महात्मा गान्धी आरो भारतनि उदांस्रि सोमावसारनाय |
| Chapter – 3 | आसामाव ब्रिटिस बेरेखा जांख्रिखांनाय आरो आबादारि बिग्रायनाय |
| Chapter – 4 | उदांस्रि सोमावसारनाय आरो आसामाव हारिमायारि जांख्रिखांनाय |
| Chapter – 5 | भारत आरो सा-सानजा ओनसोलनि हारिमुवारि गोदोमिन |
| Unit – 2 | भुमखौरां |
| Chapter – 1 | रांखान्थियारि भुमखौरां : आयदाफारि आरो सम्फद |
| Chapter – 2 | आबहावा आरो आबहावानि जेंना |
| Chapter – 3 | बहुमनि भुमखौरां |
| Chapter – 4 | आसामनि भुमखौरां |
| Unit – 3 | राजखान्थियारि बिगियान |
| Chapter – 1 | भारतारि फोरजाखान्थि |
| Chapter – 2 | मुलुगनां फसंथान हायुंआफाद आरो गुबुन गुबुन |
| Unit – 4 | रांखान्थि बिगियान |
| Chapter – 1 | खावरि आरो बेंक बेबस्था |
| Chapter – 2 | रांखान्थियारि जौगानाय |
| Chapter – 3 | जोंनि मोनथाइ जोंनि बिबान |
Note- यदि आपको इस Chapter मे कुछ भी गलतीया मिले तो हामे बताये या खुद सुधार कर पढे धन्यवाद।