SEBA Class 10 Science Question Answer In Bodo Chapter 6 जिउ बिखान्थि

SEBA Class 10 Science Question Answer In Bodo Chapter 6 जिउ बिखान्थि | Life Processes | Class 10 Science Question Answer in Bodo As Per New Syllabus to each Chapter is provided in the list of SCERT, NCERT, SEBA Class 10 Science Chapter 6 Question Answer/Class 10 Science Chapter 6 Notes In Bodo.

Class 10 Science Chapter 6 जिउ बिखान्थि

SEBA Class 10 Science Notes Chapter 6 In Bodo जिउ बिखान्थि Science Guide for Class 10th Chapter 6 In Bodo. Also Same NCERT Solutions for Class 10 Science इस पोस्ट में हम आपको ये समझा ने कि कोशिश की है की Class 10 Science Question Answer Chapter 6 in Bodo. अगर आप एक सात्र या शिक्षाक हो बोडो मीडियम की, तो आपके लिए ये बोहत लाभदायक हो सकता है।

फरा 6 जिउ बिखान्थि

Chapter 6 Life Processes

6.1 जिउ बिखान्थिफोरा मा मा ?

सों 1. जिउनि बिखान्थि माखौ बुङो?

फिन : गासैबो जिबनि देहायाव थांना थानो थाखाय खायसे जुनिया बिखान्थि सोलिगासिनो थायो। बेफोर बिखान्थिनि थाखायनो जिबआ जुनिया आखुथाइ मोनो। जिबनि देहायाव जानाय बेफोर बिखान्थिखौ जिउनि बिखान्थि बुङो।

सों 2. जिउआरिफोरनि थाखाय गुन्द्रायारि खारथिंनाय एबा रोगानायनि मानो गोनां?

फिन : जिउआरिनि सोलेर दाथायखौ दाफिननो एबा रैखाथि होनो गुन्द्रायारि खारथिंनाय एबा रोगानायनि गोनां। 

सों 3. जिउखौ फोथांना लाखिनो गोनां जानाय जिउनि बिखान्थिफोरनि मुं लिर।

फिन : जिउनि बिखान्थिफोरा जाबाय –

(i) सुफुंसारनाय।

(ii) हां लानाय।

(iii) रोगानाय।

(iv) सिगारनाय।

सोंनायफोर Page No. 95

सों 1. मानसिबादि बांजिबख्रिआरि जिबनि अक्सिजेननि गोनांथिखौ सुफुंनो गोसारलानाया (diffusion) मानो थोजासे नङा?

फिन : जों बादि बां जिबख्रिआरि जिउआरिनिआव सोरगिदिं आबहावाजों सोलेरनि जिबख्रिआ थोंजोङैनांजाबा। बेबादिनो गासै जिबख्रिआ आबहावानिफ्राय गोसारनाय खान्थिजों नांनाय बादियै अक्सिजेन मोननो हाया। बेखायनो जेथो गोनां बां जिबख्रिआरि जिउआरिफोरहा जुनियायै बिदामफोर, आंगोफोर आरो अक्सिजेन लानो हानाय आंगो बिखान्थि थानाया गोनां।

सों 2. माबेबा बेसादा गोथां (alive) होनना थिरां खालामनो मा सायख’ मानफोरखौ जों बाहायो। 

फिन : खायसे नुजानायै दोरोदनाय, लोर-सोर खालामनाय, बारायनाय, देरनाय लावनाय एबा नुजायै हिसाबै सोलेराव गुन्द्राफोरनि दोरोदनाय आखुथाइआ (सर्वआ) थांना थानायखौ फोरमायो।

सों 3. मोनसे जिबजों मा मा बायजोनि गोथां बेसादफोरा बाहायजायो?

फिन : जिउआरिआ बायजोनिफ्राय नांगौ जानाय गोथां मुवाफोरा जाबाय – 

(i) आदार : खामानि मावनायाव जिबख्रिनो गोहो, खनि संख्रि, भिटामिन बायदि होनो थाखाय।

(ii) द : जिउआव माखासे मुवा दैदेननो, आरो माखासे जाथाय जानो दैनि गोनां। 

(iii) अक्सिजेन : हां लानो थाखाय नांगौ।

सों 4. जिउ सामलायनो थाखाय नों मा मा बिखान्थिखौ गोनांथार होनना सानो? 

फिन : जिउसालायनो नांनाय खान्थिफोर–

(i) सुफुंसारनाय।

(ii) हां लानाय।

(iii) रोगानाय।

(iv) सिगारनाय।

6.2 सुफुंसारनाय

Additional Question & Answers

सों 1. सुफुंसारनाय माखौ बुङो?

फिन : जा बिखान्थिनि जोहै जिबआ आदारखौ दोगोन आरो सोबखांनानै देहानि बारायनाय आरो जौगानायजों लोगोसे गुबुन गुबुन जिबआरि बिखान्थिआव नांनाय शक्टि मोननो हायो, बेखौनो पुष्टायु बुंनाय जायो।

आदारनिफ्राय मोननायं सोलेरनि गोनां मुवाफोरखौ पुष्टायु होग्रा मुवा (Nutrients) बुंनाय जायो। 

सों 2. जिब देहायाव आदारनि गोनांथि आरो बेनि बिबाननि सोमोन्दै लिर। 

फिन : (i) आदारा शक्टि जगायो : जिब देहायाव जानाय जिबआरि रासायनारि बिखान्थिफोरा शक्ति नङाब्ला जानो हाया। बे शक्टिखौ जिबआ आदारनिफ्राय मोनो।

(ii) आदारा जिबनि बारायनाय आरो जौगानायाव मदद खालामो : आदारनिफ्राय मोननाय बिदान्थिफोरानो जिबनि महरारि बिथा प्रटप्लाजम दायो। जिबनि दैहानि दाथाय आरो बारायनाया जागायो।

(iii) आदारा जिबआरि बिखान्थिआव गोनां जानाय मुवा जगायो : जिबनि जिउआरि बिखान्थिफोरा सोलिनो थाखाय आदारनिफ्राय मोननाय खनिआरि संख्रि, दै आरो खायसे गुदि मुवा (बिदिन्थि पटासियाम, केलसियाम) आरि बिदान्थिफोरा एंगारहायि बिबान लायो।

सों 3. जिबआरिफोरा बिसोरनि आदारखौ माबोरै मोनो?

फिन : गासै जिबआरिफोरनो नांगौ जानाय शकटि आरो मुवाफोरा समान। बेफोरखौ आजावनाय खान्थिफोराल’ आलादा। रज ‘जिब आरो बेक्टेरियाफोरा जिबनङै गुदिथानिफ्राय कार्बनडाइ अक्साइड आरो दै महराव गोरलै बिदान्थि बुथुमो। बेफोरो गावनो जाग्रा। फारसेथिं गुबुननि जाग्राफोर गाहायै जिउआरि आरो मैखुन बायदिफोरा गुबुननिफ्राय एबा बायजोनिफ्राय जेथो गोनां मुवाफोरखौ आदार हिसाबै बाहायो। बेनि उनाव बेफोरखौ गोरलै बिदान्थिसिम सिफायना दैहानि बारायनाय, जौगानाय खामानिफोराव बाहायो।

सों 4. सुफुंसारनायनि गाहाय रोखोमा मा मा?

फिन : (i) गावनो मोननाय सुफुंसारनाय आरो

(ii) गुबुनजों मोननाय सुफुंसारनाय। 

सों 5. गावनो मोननाय आरो गुबुनजों मोननाय सुफुंसारनायनि फाराख लिर।

फिन :

गावनो मोननाय	गुबुनजों मोननाय
1. साननि सोरांनि हेफाजाबै गोथां बेसादनिफ्राय गावनो आदार बानायो।  2. बिसोरो गोरलै जिब नङि मुवाफोरखौ लाना गोब्राब मुवासिम सोलायहोयो। बिदिन्थि- गोथां लाइफांफोर।	1. गावनि आदारखौ बानायना लानो हाया। 2. बिसोरो गोब्राब आदारखौ जायो आरो गोरलै थाथायसिम सोलाय होयो। बिदिन्थि : जिउ आरि, मैखुन आरो गोथों नङो जिबफोर।

सों 6. गावनो जाग्रा जिब माखौ बुङो? 

फिन : जायफोर जिबआ बारमण्डलनिफ्राय कार्बन-डाइ- अक्साइड गेस, हानिफ्राय खनि संख्रि आरो दै बुथुमनानै गावनि आदारखौ गावनो बानायना लायो बेफोर जिबखौनो गावनो जाग्रा (Autotrophs) बुङो। 

सों 7. सोरां बिजिरथिनि बुंफुरलु हो।

फिन : सोमखोर लाइफांनि बिलाइआव थानाय क्लरफिल आरो साननि स्रांनि थाथाइआव बारमण्डलनिफ्राय सोबखांनाय कार्बन-डाइ अक्साइड गेस (CO₂) आरो हानिफ्राय सोबखांनाय खनिआरि संख्रि आरो दैनि गेजेराव फिनजाथाइ जानानै आदार बानायजायो। बे बिखान्थिखौ सोरां बिजिरखनाय बुङो ।

सों 8. सान शक्टिखौ रासायनारि शक्टिसिम सोलायनाय बिखान्थिखौ लिर।

फिन : सोरां बिजिरख ‘नाय (photosynthesis) 

सों 9. लाइफांआव कार्बहाइड्रेटआ मा महराव दोनथुमजायो?

फिन : स्टार्स (फुरजामुवा)।

सों 10. जोंनि देहायाव कार्बहाइड्रेटआ मा महराव दोनथुम जायो?

फिन : ग्लाइक ‘जेन।

सों 11. माबे सुफुंसार मुवाया सरासनम्स्रायै गोहो होग्रा हिसाबै बाहायजायो? 

फिन : कार्बोहाइड्रेट। 

सों 12. सोरां बिजिरथियाव जानाय जाथाइफोरखौ लिर।

फिन : जाथाइफोर –

(i) क्ल ‘रफिलनि जोहै साननि सोरां सोबनाय। 

(ii) सोरां शक्टिखौ रासायनारि शक्टिसिम सोलायनाय आरो दै गुन्द्राखौ हाइड्रजेन आरो अक्सिजेनसिम बायस्राहोनाय।

(iii) कार्बनडाइ अक्साइडखौ कार्बहाइड्रेडसिम अक्सिगार होनाय। 

सों 13. सोरां बिजिरथिनि गासै जाथाइया मोनसेनि उनाव मोनसे गोख्रैयै जाथारनांगौ नामा? बिदिन्थि हो।

फिन : जाथारनांगौ नङा । बिदिन्थि हिसाबै सान गोग्लैनाय लाइफांफोरा हराव कार्बनडाइ अक्साइड लायो आरो गेजेर खौसेखौ खालामो।

सों 14. सोमखोर रज’ जिबफोरखौ मानो आदार दिहुनगिरि (Producer) बुङो?

फिन : सोमखोर रज ‘जिबफोरा आदारखौ गावनो बानायना लायो। बिसोरनि सायाव थोंजोंङै सोमखोर नङि रज’ जिब आरो जिउआरिआ सोनारो। बेफोरनिफ्रायसो जिउआरिफोरा सुफुंसार मोनो। बेखायनो सोमखोर रज’ जिबखौ आदार दिहुनगिरि (Producer) बुङो।

सों 15. गांसे बिलाइनि थोंगोर दानस ‘नि मोनसे रोखा सावगारि आखिना बाहागोफोरखौ दिन्थि। 

फिन : 

सों 16. गांसे बिलाइनि क्लर’प्लास्ट दिन्थिनो बिलाइ रोदानि थोंगोर दानसनि सावगारि आखिना बाहागोफोरखौ सिनायथि हो।

सों 17. दै खफ एंगारनाय माखौ बुङो? खफ एंगारनायनि गोनांथिआ मा? 

फिन : रज ‘जिबआ हानिफ्राय सोबखांना लानाय गासै दैखौ बाहायजोबा। बेखायनो बाग्ला जानाय दैखिनिआ देहानिफ्राय खफ’ जानानै मोनसे थि जाथाइजों बारमण्डलाव ओंखारलाङो। बे जाथाइखौ दैखफ’ एंगारनाय बुङो । 

खफ एंगारनायनि गोनांथि :

(क) खफ एंगारनाया दै आरो खनि संख्रिफोरखौ लाइफांनि गोजौ फारसे दावखोनायाव मख ‘जाथाव बिबान लायो।

(ख) बे जाथाइआ रज ‘जिबनि देहा बिदुंखौ सामलायना लाखियो। 

(ग) खफ एंगारनाय जानाय थाखाय खानाय रोदाया हानिफ्राय रोसि सोबखांनाय गोहो मोनो।

सों 18. बिलाइ गुदुं (stomata) नि रोखा सावगारि आखि आरो बेनि बेंग्रा जिबख्रिनि खामानिखौ लिर।

फिन : बिलाइ गुदुं :

बेंग्रा जिबख्रिनि खामानि– बेंग्रा जिबख्रिआ बिलाइ गुदुंनि गेवलां जानाय आरो खबजबनाय जाथाइखौ सामलायो। जेब्ला दैआ बेंग्रा जिबख्रियाव हाबो अब्ला बेयो देरगाखांना बिलाइ गब्लं एबा गुदुंआ गेवलां जायो। मानोना देरगाखांनाय जाहोनाव गब्लंनि उल्थाथिंजाय थानाय जिबख्रि इनजुर फारनैआव बांसिन नारथाय गोग्लैना गब्लंखौ गेवलां खालामो। जेब्ला बेंग्रा जिबख्रिनिफ्राय दैआ ओंखारलाङो अब्ला बायजोआरि गोबा जिबख्रिआ गावनि सिगांनि थाथाइयाव फैफिनो आरो बिलाइ गुदुंआ खबजबो।

सों 19. बिलाइ गुदुंनि गाहाय खामानिफोरखौ मख’।

फिन : बिलाइ गुदुंनि गाहाय खामानि : 

(i) लाइफां आरो बारमण्डलनि गेजेराव गेस (O₂ आरो CO₂) नि सोलाय सोल’ जानो थाखाय बिलाइ गुदुंनि गोनांथि। 

(ii) बाग्ला जानाय दैखौ बिलाइ गुदुंनि हेफाजाबै एंगारो।

(iii) लाइफांआव दैनि बिबांआ खमायोब्ला बिलाइ गुदुंनि गेवनाया खोबथेयो। हरनि समावबो गुदुंआ खोबथेयो। बेबादिनो बिलाइ गुदुंआ लाइफांनि खफ’ एंगारनायखौ सामलायो। 

सों 20. दुंहाव ओनसोलनि लाइफांनि बिलाइ गुदुंआ सानाव खोबथेना थायो। सोरां बिजिरथिनि थाखै बिसोरो माबारै कार्बन डाइ अक्साइड मोनो? 

फिन : दुंहाव ओनसोलाव बांद्राय बिदुं जानाय थाखाय बांद्राय खफ’ एंगरनायखौ खमायनो बिलाइ गुदुंआ खोबथेनानै थायो। जाखायनो बै लाइफांफोरा हरावसो CO₂ लानो आरजायो जेब्ला बिलाइ गुदुंआ गेवओ। बे हराव लानाय CO₂ आ गेजेरनि खौसे सोमजिहोयो। बै गेजेर खौसेआ सानाव क्ल ‘रफिलनि जोहै सोबना लानाय शक्टिजों आदार बानायजायो।

सों 21. लाइफांनो प्रटिन बिजिरनो नांगौ जानाय मोनसे गोनांथार गुदि मुवाया मा? बे गुदि मुवाखौ लाइफांआ माबोरै मोनो? बेनि अनगायैबो हानिफ्राय सोबना लानाय गुदि मुवाफोरनि मुं लिर। 

फिन : नाइट्रजेन।

बे नाइट्रजेनखौ जिबनङै नाइट्रेट एबा नाइट्राइट महराव लायो एबा बेक्टेरियाआ बारमण्डलनिफ्राय बानायनाय नाइट्रजेन गोनां जिबखौसे हिसाबै लायो। 

नाइट्रजेननि अनगायैबो हानिफ्राय सोबना लानाय गुदि मुवाफोरा जाबाय फसफरास, सोर (आयरण) आरो मेगनेसियाम।

सों 22. गुबुनजों मोननाय सुफुंसारनाय माखौ बुङो?

फिन : जाय सुफुंसारनायाव जिबआ लाइफां मुलुग एबा जिउआरि मुलुगनिफ्राय थ्रोंजोङै जिबआरि आदार जानानै सुफुंसारनाय मोननो हायो, बेसोरखौ गुबुनजों मोननाय सुफुंसारनाय बुङो।

सों 23. गुबुनजों मोननाय सुफुंसारनायनि मोनथाम आदबखौ बिदिन्थि होना लिर। 

फिन : आदबफोर :

(i) देहानि बायजोआव आदारनि मुवाफोरखौ बायस्राहोयो उनाव बेफोरखौ सोबखाङो। बिदिन्थि-रुतिआव सोमजिनाय मैखुन, इष्ट आरो जाग्रा मैखुन।

(ii) आदारखौ सिंआव लाङो आरो देहा सिंआव बेखौ बायस्राहोयो। बिदिन्थि-गांसो जाग्रा, फिथाइ-सामथाय जाग्रा, एम्फौ एनला जाग्रा, ना जाग्रा जुनातफोर। 

(iii) सुफुंसारनायखौ गुबुन लाइफां एबा जुनातनिफ्राय जेबो हानि खालामा लासेनो लायो। बिदिन्थि बेदलाव, फिलौ, थामफै बाइदि बायदि।

सों 24. मोननै बिदिन्थि होना बियाद जिबिआरि सुफुंसारनायनि बागै लिर। 

फिन : बियाद जिबिआरि सुफुंसारनायः बे रोखोम सुफुंसारनायाव जिबआ गुबुन जिउआरि एबा रज ‘जिबनि देहानि रोसि एबा बिदामनिफ्राय सुफुंसार मोनो। बेफोर जिउआरिखौ बियाद आखुनि जिउआरि (Parasitic animal) बुङो।

खायसे बियाद आखुनि जिउआरि गुबुन जिउआरिनि देहानि बाहेराव आरो खायसेआ देहा सिंआव थायो।

बिदिन्थि : बाहेराव थाग्रा– थामफै, बेदलाव 

सिंआव थाग्रा– फिटा फिलौ, प्लाजमडियाम भाइभेक्स

सों 25. बिदिन्थिजों लोगोसे गाहाय थाखोनि जिउआरिनि सुफुंसारनायनि खान्थिखौ फोरमाय।

फिन : उन्दै थाखोनि जिउआरिफोरा आबहावायाव थानाय जिउसाफोरनिफ्रायनो सुफुसारनाय मोनो। उन्दै थाखोनि जिउआरिआव आदारखौ गावनि सा बाहागोजोंनो जायो। बिदिन्थि हिसाबै- एमिबानि देहायाव आदार जानो थाखाय जेबो जुनिया आंगो थाया। आदारनि खाथिआव फैब्ला एमिबाया बेनि सोरगिदिं खायसे नंखाय आथिं दानानै आदार काप दायो आरो आदारखौ कापआव जोख्लोबनानै लायो। अब्ला आदार कापआ आदार रोसि लाथुमग्रासिम सोलायो आरो जोबनायाव बेयो जिबख्रि रोसिआव हाबलाङो। बेनि जाउनाव जिबख्रि रनदैनि दोगोन रोसिआ आदारनि सायाव जाथाइ खालामो आरो आदाराव थानाय जेथो गोनां बिदान्थिफोरा गोरलै आरो गलिग्रा महराव सोलायो। बेनि उनाव गोरलै बिदान्थिफोरा जिबख्रि रनदैआव गलिलाङो। थालांनाय दोगोन जायै मुवाफोरा जिबख्रिनि सा बाहागोजों बाहेरायाव नारहरजायो ।

सों 26. मानसिनि दोगोन बिखान्थिनि मोनसे रोखा सावगारि आखिना बाहागोफोरखौ दिन्थि।

फिन :

सों 27. दोगोन बिथोबआ मा? मानसिनि दोगोन बिखान्थिआव थानाय दोगोन बिथोबफोरनि लिर।

फिन : जायफोर बिथोबनिफ्राय निज्रायनाय एबा ओंखारनाय रोसिआ जामुंनि दोगोन जानाय हाबायाव हेफाजाब खालामो बैफोर बिथोबखौ दोगोन बिथोब बुङो।

मानसिनि दोग्रोन बिखान्थिआव थानाय दोगोन बिथोबफोर: (i) खुदै बिथोब (ii) बिखा (iii) आमायथु एबा अग्नाशय (iv) बान्दार बिथोब आरो (v) बिबु बिथोब।

सों 28. खुगानि खुदैआव थानाय एनजाइमनि मुंआ मा ? बिनि खामानिखौ लिर।

फिन : खुगानि खुदैआव टायेलिन एबा खुदैआरि एमाइलेइज मुंनि एनजाइम थायो। बेयो आदाराव थानाय जेथो गोनां गुन्द्रामानि फुरजा मुवाखौ सिफायना सिनि सिम सोलायहोयो।

सों 29. खुगा दन्दराव जामुंनि बबे बिदान्थिआ दोगोन जायो? 

फिन : फुरजामुवा (Starch) 

सों 30. खुगा दन्दराव जानाय जामुंनि दोगोन जाथायखौ फोरमाय? 

फिन : खुगा दन्दराव महरारि आरो रासायनारि बिखान्थिजों जामुंनि दोगोन हाबाया जाजेनो। आदारफोरखौ गिबियावनो हाथाइनि हेफाजाबाव गुन्दै एबा मिजि खालामना लानाय जायो। खुगायाव आदारा खुदैजों मिसाल जाना बिज्ला जायो। बे एखे समावनो खुदैआव थानाय दोगोन एनजाइम खुदैआरि एमाइलेइजआ आदारनि फुरजामुवाखौ बायस्राहोना सिनि सिम सोलायो। बेनि उनाव खुगा दन्दरनिफ्राय आदारा इसफेगाससिम थांना बान्दाराव हाबहैयो।

सों 31. बान्दार बिथोबनिफ्राय ओंखारनाय रोसिआव मा मा थायो? बै रोसिफोरनि खामानिआ मा? 

फिन : बान्दार बिथोबनिफ्राय पेपसिन मुंनि दोगोन एनजाइम, मिउकास आरो हाइड्र’क्ल ‘रिक एसिड ओंखारो। 

पेपसिनआ हाइड्र ‘क्लरिक एसिडनि हेफाजाबाव प्रटिन दोगोन खालामो आरो जामुंआव थानाय जिउसाखौ फोजोबस्राङो।

मिउकासआ दिदोम थासारिआव बान्दार इसिं बाहागोखौ एसिडनि जाथाइनिफ्राय रैखाथि होयो। 

सों 32. जांमुनि दोगोनआव बिखानि बिफावआ मा?

फिन : बिखाया बयनिख्रुइ देरसिन दोगोन बिथोब। बे बिखा बिथोबनिफ्राय ओंखारनाय बिख्लो रोसिआ खारदैआरि। बेखायनो बियो जामुंखौ खारदैआरि खालामो आरो मेजेम बेसादखौ उन्दै उन्दै सेरेफसिम सिफायो।

सों 33. मानसिनि देहायाव आमायथुनि खामानिआ मा?

फिन : आमायथुनि खामानि : आमायथुआ आमायथु रोसि जिरिहोयो। आमायथु रोसिआव ट्रिपसिन, आमायथु एमाइलेज आरो आमायथु लाइपेज थायो। ट्रिपसिनआ प्रटिन दोगोन खालामो। आमायथु एमाइलेजआ फुर्जामुवा दोगोन खालामो आरो आमायथु लाइपेजआ मेजेमखौ दोगोन खालामो।

सों 34. भिलाइया मा? बेनि खामानिखौ मख।

फिन : मानसिनि सिंआरि बिबुनि इनजुराव थनजानाय जोबोद उन्दै खायसे आसिबादि बारायदों सोमजियो बेसोरनो भिलाई। 

बिबु नालायाव थानाय गोरलै बिदान्थिफोरा भिलाइ आरो खानायदों नालाफोरनि इनजुरखौ सोरखिनानै जोबोद गोरलैयै थैनि दाहाराव हाबलाङो।

सों 35. हाथाइ सेवख ‘नाया मा? बेयो माबोरै जायो? बेखौ होबथानायनि राहाफोरा मा? बेखौ जोथोन लायाब्ला मा जानो हागौं? 

फिन : हाथाइ सेवख ‘नाय : हाथाइ सेवख ‘नाया जाबाय हाथाइ खोलोब आरो हाथाइ मोदोमनि लासै लासै गुरै खालामनाय।

जेब्ला बेक्टेरियाया सिनिनि सायाव जाथाइ खालामना एसिड सोमजिहोयो बेयो हाथाइ खोलोबनि गुरै आरो खनियारि मुवाखौ खहा जाहोयो। बेक्टेरियाया जिबख्रि थुबुर मोदोमबां आदार गुन्द्राफोरजों हाथाइआव सिथाबना प्लेक सोमजिहोयो। प्लेकआ हाथाइखौ जोख्लोबना लानायनि थाखाय खुदैया एसिडखौ मदला खालामनो सहैया।

आदार जाखांनायनि उनाव हाथाइखौ मानयिला बेक्टेरियाया एसिड सोमजिहोनायनि सिगां प्लेकखौ बोखारो। जोथोन लायाब्ला जिबसाफोरा हाथाइनि माजाखौ गाग्लोबो, हाथाइ साहोयो आरो बेराम जाहोयो।

सों 36. खुगायाव बिजोंआ मानो एसिडआरि जायो? एसिडआरि जानायनि गाज्रि जाउनआ मा? बेखौ माबोरै होबथानो हायो?

फिन : बेक्टेरियाआ सिनि आरो हाथाइआव सिथाबना आदार गुन्द्राफोरनि सायाव जाथाइ खालामा खुगायाव एसिडआरि बिजों सोमजिहोयो।

बेनि जाउनाव हाथाइखौ जामख ‘होयो आरो लोरबां खालामो। बेखौ होबथानो खेबफ्रोमबो जाखांनाय उनाव हाथाय हुग्रा मलम (toothpaste) जों मानजिनांगौ।

सों 37. जोंनि सोलेराव मेजेमा माबोरै दोगोन जायो? बे मावखान्थिआ माबोरै जायो?

फिन : मेजेमा बिबुसायाव दोगोन जायो। 

(i) बिख्लो रोसिआ मेजेमनि गेदेर गुन्द्रामाखौ सिफायना गलिलाङि लाव लाव उन्दै सेरेफसिम सोलायहोयो।

(ii) आमायथु रोसिनि लाइपेइजआ आरोबाव सिफायना फेति एसिड आरो ग्लिसारलसिम सोलायहोयो। 

सों 38. कार्बहाइड्रेट, प्रटिन आरो मेजेमा दोगोन जानाय उनाव सोमजिनाय जोबथा बिदान्थिआ मा?

फिन : दोगोन जानाय उनाव जोबथा बिदान्थि–

(i) कार्बहाइड्रेटनिआ ग्लुकज।

(ii) प्रटिननिआ एमिन’ एसिड।

(iii) मेजेमनिआ फेति एसिड आरो ग्लिसारल।

सों ना य Page No 101

सों 1. गावनो सुफुंसारनाय आरो मालाइजों सुफुंसारनायनि गेजेराव फारागफोरा मामा?

फिन : 

1. गावनि आदारखौ गावनो सोरां। 2₂CO₂ आरो H₂O खौ बायजोनिफ्राय सोबना लायो आरो सानसोरांनि हेफाजाबै लायो। बिसोरो लाइफ एबा आदार बानायना शक्रिनि फुंखा हिसाबै दोनथुमो।

1. सोरां बिजिरख’ दानो हाया। गावनो जाग्राफोरनिफ्राय थोंजोङै एबा खेंसालियायै लायो।बिसोरो लाइफां एबा जिउआरिखौ गुबुन गुबुन रोखोमै जायो।

सों 2. सोरां बिजिरख’ दानायनि थाखाय गोनां जानाय मोनफ्रोमबो गोथां बेसादफोरखौ लाइफाङा बबेयाव मोनो?

फिन : गोथां लाइफांनि बिलाइयाव ‘क्ल’रफिलआवनो सोरां बिजिरख’ दानाया जाफुङो। बे बिखान्थिनि थाखै नांगों जानाय गोथां मुवाफोर जेरै– CO₂, H₂O आरो सोरां शक्टि।

सोरां शक्टिखौ साननिफ्राय, H₂O खौ हासिंनिफ्राय रोदानि जोहै सोबनानै आरो CO₂ खौ बारमण्डलनिफ्राय बिलाइ गुदुंनि हेफाजाबै सोबना लायो।

सों 3. जोंनि बान्दाराव एसिदनि बिफावा मा?

फिन : बान्दारनि बान्दार बिथोबनिफ्राय जिरिनाय हाइड्र’क्लरिक एसिडआ नांनाय बादियै एसिडआरि खालामना पेपसिन एनजाइमखौ सांग्रां जानायाव मदत खालामो। आदाराव थानाय जिउसाखौ फोजोबस्राङो। 

सों 4. दोगोन एनजाइमनि खामानिआ मा? 

फिन : दोगोन एनजाइमफोरा आदाराव थानाय गेदेर (जेथोगोनां) गुन्द्रामानि बिदान्थिफोरखौ सिफायना गोरलै थाथायसिम सोलायहोयो जाहाते बिबुसानि इनजुरा बै गोरलै बिदान्थिफोरखौ सोबखांनो हायो।

सों 5. दोगोन जानाय आदारखौ सोबखांनो बिबुसाया माबोरै मावफुङो? 

फिन : बिबुसाया आदार नालानि लावसिन बाहागो। बेवहायनो दोगोन जानाय आदारनि गुन्द्राफोरा सोबखां जायो आरो बेफोरखौ थैआ रोगाना सोलेरनि गासै जिबख्रिनो रानना हैयो। बिबुसानि इनजुराव थनजानाय जोबोत उन्दै खायसे आसिबादि बारायदों सोमजियो। बेफोरखौ भिलाइ बुङो। भिलाइनि सिंआरि बाहागोआ सानथ्र ‘हायि खानायदों नालाफोरजों दाजानाय। भिलाइफोरनि थनथ्र ‘नाय गोसारनाय जानाय जाहोनाव आदारनि गोरलै बिदान्थिफोरा भिलाइ आरो खानायदों नालाफोरनि इनजुरजों सोरखिना गोरलैयै थैनि दाहाराव हाबलाङो।

6.3 हां लानाय RESPIRATION

Additional Questions

सों 1. हां लानाय माखौ बुङो?

फिन : देहानि जिबख्रिफोरनि सिङाव जामुनि गुन्द्रामायाव थाथुमनाय शक्टि बिजिरख ‘नाय बिखान्थिखौ हां लानाय बुङो।

सों 2. बारजिबि नङि हां लानाया मा? बे मावखान्थिआव जानाय जाथाइखौ लिर।

फिन : अक्सिजेन गैयाबालानो ग्लुकजनि बायस्राहोनाय मावखान्थिखौ बारजिबि नङि हां लानाय बुङो। 

बे मावखान्थिआव ग्लुकज गुन्द्रामाया बायस्राना इसेल’ शक्टि सोमजिनायजों लोगोसे इथाइल एलकहल आरो कार्बनडाइ अक्साइड सोमजियो।

C₂H₁₂O → 2C₂H₅OH + 2CO₂ + शक्टि (ATP)

 ग्लुकज            इथाइल एलकहल

सों 3. खायसे उन्दै थाखोनि जिउसा बेक्टेरिया, इष्ट बायदिफोराव हां लानाया माबोरै जायो फोरमाय। 

फिन : खायसे उन्दै थाखोनि जिउसा बेक्टेरिया, इष्ट बायदिफोराव बारजिबि नङि हां लानाय जायो। ग्लुकज गुन्द्रामाया जिबख्रि रन्दैआव बायस्रानाय जाना इसेल’ शक्टि सोमजिनायजों लोगोसे इथाइल एलकहल आरो कार्बनडाइ अक्साइड सोमजियो।

  C₆H₁₂O₆ → 2C₂H₅OH + 2CO₂ + शक्टि (ATP)

    ग्लुकज           इथाइल     एलकहल

सों 4. मोदोम जिबख्रिआव O₂ नि आंखाल जायोब्ला हां लानाया मा बादि जायो?

फिन : बिसि जिबख्रिआव O₂ नि आंखाल नायोब्ला ग्लुकज गुन्द्रामाया बायस्राना लेकटिक एसिड आरो इसे शक्टि सोमजियो। 

C₆H₁₂O₆ → C₃H₆O₃ + शक्टि

  ग्लुकज         लेकटिक एसिड

सों 5. बारजिबि हांलानाय माखौ बुङो? बे हांलानायनि मावखान्थिफोरखौ गुसुङैबेखेव।

फिन : अक्सिजेननि हेफाजाबै ग्लुकज गुन्द्रामानि बायस्राहोनायखौनो बारजिबि हांलानाय बुङो।

बेबादि हां लानाया गाहायै मोननै थोरफोआव जाफुङो। 

गिबि थोरफो : ग्लुकज गुन्द्रामाया जिबख्रि रनदैआव खावस्लिंयै अक्सिजाबनाय जायो। बे थोरफोखौ ग्लाइकलाइसिस बुङो। बेवहाय इसेल’ बिबांनि शक्टि सोमजिना पाइरुभिक एसिड सोमजियो।

नैथि थोरफो : बे थोरफोआ जायो जिबख्रिनि माइट ‘कन्ड्रियाआव। बेवहाय पाइरुभिक एसिडआ अक्सिजेननि हेफाजाबाव फुरायै बायस्राना शक्टि, कार्बन डाइ अक्साइड आरो दै सोमजियो। 

पाइरुभिक एसिड + O₂ → CO₂ + H₂O + शक्टि

बेखायनो बेनि गासै फिनजाथाइया दिन्थिजायो –

C₂H₁₂O₆ + O₂ → CO₂ + H₂O + शक्टि (ATP)

सों 6. ATP नि आबुं ओंथिआ मा ? बेयो माबोरै सोमजियो? बेयो बायस्रानाय उनाव बेसेबां बिदुं सोमजियो ? बेनि बाहायथिया मा? 

फिन : ATP नि आबुं ओंथिआ Adenosine Triphosphate (एडिन’ साइन ट्राइफसफेट) हां लानायाव सोमजिनाय शक्टिआ जिबख्रिआव थानाय ADP (एडिन ‘सिन डाइफसफेट) गुन्द्रानि लोगोआव मोनफायै फसफेट (P) दाजाबदेरनानै ATP (एडिन’ सिन ट्राइफसफेट) मुंनि गुन्द्रामा दायो।

  ADP + (P) ――शक्टि–→ ATP

जेब्ला ATP आव P दाजाबनाय खर’ आ दैजों बायलाङो अब्ला 30.5 KJ (किल’ जुल) ज ‘खानि समान शक्टिआ उदां जायो। 

   ATP +  दै ADP + P + शक्टि

जिबख्रिआरि हांलानायाव सोमजिनाय शक्टिफोरखौ सोलेरनि गोबां खामानि जैरै– प्रटिन बिजिरनाय, गेहेनोपोरनि मावखांनाय, बिसोम मोनदांथि सामलायनाय बाइदि खामानियाव बाहायो।

सों 7. “हांलानाया दुंखांग्रा फिनजाथाइ” सोमजिनाय रासायनारि समानथाइ होना फोरमाय।

फिन : जिबख्रिआरि हांलानाय समाव ग्लुकज गुन्द्रामाया बायस्राना गाहायनि ज ‘थाइया सोमजियो।

C₆H₁₂O₆ + 60₂ → 6CO₂ + 6H₂ O + शक्टि 

  ग्लुकज                  दुंखांग्रा जाथाइ

सों 8. जिबख्रिबांआरि जिबनि थाखै अक्सिजेन नांनायखिनिखौ सुफुंनो गेस गोसारलानाय (Diffusion) आ थोजासे नङा मानो?

फिन : जिबख्रिबांआरि जिबनि सोलेरा जोबोत गेदेर महरनि। बेखायनो नांनाय जखानि आरो नांनाय सम बादियै थोजासे अक्सिजेनखौ देहानि गासै आंगोआवनो गेस गोसारलानाय मावखान्थिजों मोननाय नङा। बेफोर देहानि थाखै हांलाग्रा थांखिनाय आंगोआरि बिखान्थि आरो थै दैदेनग्रा बिखान्थि नांगौ जायो। 

सों 9. मानसिनि गन्थं दन्दरनि जोहै हां लानाया माबोरै जायो?

फिन : मानसिया गन्थं दन्दरनि जोहै हांलाना देहा सिङाव बारखौ लाङो। गन्थं दन्दरनि गेजेरजों थांनाय बारआ थांग्रा नलिआव थानाय मिहि खानायजों सरजायो। बार थांग्रा नलिआव मिउकासबो थायो जाय बे खामानिआव मदत खालामो। बेनिफ्राय गारामा आरो उनाव संफ्लसिम सहैयो।

सों 10. मानसिनि हांलानाय बिखान्थिखौ बेखेव।

फिन : मानसिनि हांलानाय सोलोआ गाहायाव होनाय मोननै थोरफोआव जाफुङो।

(i) हां बोनाय

(ii) हां हगारनाय

हां बोनाय समाव बिखा दन्दरनि रोजागासैआ बाङो। हां बोनाय समाव खामि हारा फोनांजाबग्रा रोखोमसे गेजेर बिसिया दाब्ले जायो जाउनाव बिखा दन्दरा गेदेर जायो आरो खामि हाराखौ अरगाहोयो। बेनि जाहोनाव बारआ समफ्ल ‘सिम सोबखांजायो आरो देरखांनाय बारम ‘नाखौ आबुं खालामो। थैआ सोलेरनि आद्रा बाहागोनिफ्राय कार्बनडाइ अक्साइडखौ रोगाना लाबोनानै बेखौ बारम ‘नायाव उदां खालामफैयो आरो बार म ‘नायाव थानाय थै नालाफोरनि थैआ अक्सिजेनखौ सोबखांना लानानै सोलेरनि गासैबो जिबख्रियाव दैथाइ हरो।

कार्बनडाइ अक्साइडखौ बारम ‘नानिफ्राय बाराव गन्थं नालाजों हगार हरो, बे बिखान्थिखौ हां हगारनाय बुङो। बे समाव बिखा दन्दरआ नारसेबनाय जायो आरो समफ्ल ‘आव नारथाइ गोग्लैयो। अब्लानो बेवहाय थानाय CO₂ गेसआ बोयजोआव ओंखारलाङो।

सों 11. मानसिनि समफ्ल’आव गेसनि सोलाय सोल’ माबोरै जायो?

फिन : समफ्ल’आव थानाय बार जिबख्रिनि बिदलाबा जोबोद गोबा खोबग्रा बिदामजों दाजानाय। बेनि गेजेरजों गेसनि गुन्द्रामाफोरा गोरलैयै थांलाय फैलाय खालामनो हागौ। मोनफ्रोम बार जिबख्रिनि बायजो फारसे रोजा थै–जे थायो आरो बे जेखौ दानाय थै खानाय रोदाफोरनि बिदलाबाबो जोबोद गोबा। बेसोरनि गेजेरजोंबो गेसनि गुन्द्रामाया गोरलैयै थांलाय फैलाय खालामनो हायो। बेफोरो नांजाबना थानायनि थाखाय O₂ आ बार जिबख्रिनिफ्राय थैसिम आरो कार्बन–डाइ अक्साइडआ थैनिफ्राय बार जिबख्रिसिम हाबलाङो।

सों ना य Page No. 105

सों 1. हां लानायनि थाखाय अक्सिजेन आजावनायाव दैयाव थाग्रा जिबआ बोरियाव थाग्रा जिबनिख्रुइ मा खाबु गोनांसिन? 

फिन : दैआव थाग्रा जिबफोरा दैजों गलिना थानाय अक्सिजेनखौ बाहायो। दैआव गलिना थानाय गेसआव अक्सिजेननि गोसाथिआ खम जानायखाय दैआव थाग्रा जिबफोरनि हां लानाया बोरियाव थाग्रा जिबफोरनिख्रुइ गोखैसिन। बोरियाव थाग्रा जिबफोरा अक्सिजेन आबुं बारमण्डलनिफ्राय अक्सिजेन गेसखौ हां लायो। 

सों 2. बायदि रोखोमनि जिबफोराव शक्टि जगायनो ग्लुकजआ मा मा राहाजों अक्सिजाबो?

फिन : गिबि थोरफोआव, गासैबो जिबनि जिबख्रि रनदैआव ग्लुकज गुन्द्रामानि अक्सिजाबनाय जाना पाइरुबिक एसिड सोमजियो। बेबादि बायस्रानायाव इसेल बिबांनि शक्टि सोमजियो। 

बेनि उनाव पाइरुबिक एसिडआ गुबुन गुबुन रोखोमै गुबुन गुबुन जिबिनि बिथिंआव बायस्रानाया जाथावो। 

(i) बारजिबि नङैहांलानाय : इष्ट जिबख्रिनि किम्बन (fermentation) जानाय समाव बार गैया बालानो पाइरुबिक एसिडआ बायस्राना इथानल आरो कार्बन-डाइ अक्साइड सोमजियो। 

(ii) बार जिबि हांलानाय : बे बादि हां लानायाव अक्सिजेननि हेफाजाबै पाइरुबिक एसिडखौ फुरायै बायस्राहोनाय जायो। बेवहाय गोबां बिबांनि शक्टि उदां जानाय जों लोगोसे कार्बन–डाइ अक्साइड आरो दै सोमजियो।

(iii) अक्सिजेननि आंखालाव हां लानाय : माब्लाबा गोब्राब खामानि मावोब्ला एबा गेलेनाय बायदि समाव जोंनि मोदोम गेहेनाव अक्सिजेननि आंखालाव बे बादि हांलानाया जायो। बे हांलानायाव पाइरुबिक एसिडआ इसे बिबांनि शक्टि उदां जानायजों लोगोसे लेकटिक एसिड सोमजियो।

सों 3. मानसिनि बेलायाव अक्सिजेन आरो कार्बन डाइ अक्साइडआ माबोरै दैथाय जायो?

फिन : (a) अक्सिजेननि रोगानाय : बारजिबख्रिनिफ्राय थैनि गोजा थै सेरेफआव थानाय हिमग्लबिन मुंनि जारोम गाब गोनां मुवाया सोलेरनि गुबुन गुबुन बिदाम जिबख्रिसिम रोगाना लाङो। अक्सिजेन गेसआ गोसारनाय बिखान्थिनि जोहै बिदाम जिबख्रिफोराव हाबलाङो आरो बेवहाय जिबख्रिआरि हांलानाया जागायजेनो।

(b) कार्बन–डाइ अक्साइड रोगानाय : कार्बन डाइ अक्साइडआ दैआव गोबाडैनो गलियो। बेखायनो थैआव थानाय प्लाजमाजों गलिनाय महराव बिदाम जिबख्रिफोरनिफ्राय ओंखारबोयो। उनाव संफ्ल ‘सिम स ‘हैब्ला बाराव ओंखारलाङो। 

सों 4. मानसिनि बेलायाव गेसफोरखौ सोलायसोल ‘खालामनो थाखाय जायगा बांहोनो माबोरै मानसिनि सम्पल ‘आ बुमिन (Design) दाजादों? 

फिन : संपल ‘आव हांनालाया मोननै दालाइ हां नालायाव रानजायो। दालाइ हां नालानि मोनफ्रोम खर’ आ बेलुन बादि दाथाइ आलभिअलि जों नांजाबनाय। आलभिअलिआ बार हाबलाय ओंखारलाय हाबलाय जानो हाजासे थोजासे जायगा दं। आलभिअलिआ माखासे थै नालासाजों जे बादि दाजानाय।

6.4. रोगानाय

Additional Questions

सों 1. जोंनि सोलेरनि गाहाय दैदेनग्रा बिजोंआ मा?

फिन : थै।

सों 2. थैनि गाहाइ थाफादेरफोरा मा मा ? थैनि गाहाइ हाबाफोरखौ मख’। 

फिन : थैनि गाहाय थाफादेरफोरा जाबाय–

(i) गोजा थै सेरेफ।

(ii) गुफुर थै सेरेफ।

(iii) प्लेतिलेटस।

(iv) प्लाजमा।

थैनि गाहाइ हाबाफोरखौ मोनथाम बाहागोआव रानजायो– 

(i) रोगानाय : थैआ जामुं मुवा आरो हां लानाय गेसफोरखौ रोगाना मोदोम सिंनि बिसिफोरनो रानना हैयो।

(ii) होबथानाय : थैआव थानाय गुफुर थै सेरेफआ सोलेर गाग्लोबग्रा जिउसाफोरखौ फोथैस्रांनानै बेरामनिफ्राय रैखा खालामो।

(iii) बिदुं सामलायनाय : थैआ मोदोमनि गासै बाहागोआव बिदुंखौ सामलायना लाखियो।

सों 3. मैखुनआ मा?

फिन : मैखुना सरासनस्रायै समफ्ल’ मोननैनि गेजेराव थानाय, जुनिया मोदोम गेहेनजों दाजानाय शंखु महरनि पाम्प बादि मोनसे अंग। बेयो अरायसम थनथ्र ‘नाय गोसारनाय हाबा मावबाय थानो हायो। 

सों 4. मानसिनि देहायाव अरायसम पाम्प जाबाय थाग्रा आंगोआ मा?

फिन : मैखुन।

सों  5. मानसिनि मैखुननि इसिंआरि दाथाइनि रोखा सावगारि आखिना गाहायाव होनाय बाहागोफोरखौ सिनायथि हो।

(i) आगसि अखं।

(ii) आगसि इसिं।

(iii) आगदा अखं।

(iv) आगदा इसिं।

(v) गेदेर धमनि।

(vi) क्ल ‘म धमनि।

फिन :

सों 6. मानसिनि थै दैदेननाय बिखान्थिआ माजों दाजानाय? 

फिन : मानसिनि थै दैदेननाय बिखान्थिआ थै, थै रोगाग्रा नाला आरो मैखुनजों दाजानाय।

सों 7. मानसिनि मैखुना मोनबेसे खथा गोनां आरो मा मा?

फिन : मानसिनि मैखुना मोनब्रै खथा गोनां।

(i) आगसि अखं।

(ii) आगसि इसिं।

(iii) आगदा अखं।

(iv) आगदा इसिं।

सों 8. मोदोमनि गुबुन गुबुन बाहागोनिफ्राय मानसिनि मैखुनसिम थै रोगानाने लाबोग्रा गेदेर थै रोदा दोंनैनि मुं लिर।

फिन : गोजौ गेदेर रोदा आरो गाहाय गेदेर रोदा। (Superior and inferior Vena Cava)

सों 9. मानसिनि मैखुननिफ्राय ओंखारलांग्रा धमनि दोंनैनि मुं लिर। 

फिन : क्लम धमनि आरो सिस्टेमिक धमनि।

सों 10. मानसिनि मैखुननि गेजेरजों गोगो आरो गोगो नङै थैफोरा माबोरै दैदेनलाङो बेखेव। 

फिन : मानसिनि समफ्लनिफ्राय अक्सिजेन गोनां गोगो थैआ दोंब्रै क्लम रोदानि जोहै मैखुननि आगसि अखंआव उदां जायो। मैखुननि बे अखं इनजुरा रोजासिन। आगसि अखंआव हाबहैनाय थैआ अखंनि थनथ्र ‘नाय जाहोनाव आगसि इसिंसिम हाबहैयो। अखं आरो इसिंनि गेजेराव थैआ उल्था थांफिननो हायैबादि मोनफा भाल्भ थायो। 

आगसि इसिंआ आगसि अखंनिफ्राय मोननाय गोगो थैखौ सिष्टेमिक धमनिजों मोदोमनि गुबुन गुबुन बिदाम आरो अंगफोरसिम दिहुननानै हरो।

मोदोमनि गुबुन गुबुन बाहागोनिफ्राय गोथार नङि थैफोरखौ गोजौ गेदेर रोदा आरो गाहाय गेजेर रोदा दोंनैआ आगदा अखंआव उदां जायो । आगदा अखंआ थनथ्रनायनि जाहोनाव बे गोगो नङै थैफोरा आगदा इसिंआव हाबहैयो। बेनि उनाव बे इसिंनिफ्राय क्ल ‘म धमनिजों समफ्ल ‘सिम ओंखारलाङो। 

सों 11. धमनि आरो थै रोदानि फाराख लिर।

फिन :

धमनि	थै रोदा
1. धमनिफोरा मैखुननिफ्राय गुबुन गुबुन आंगोसिम थै रोगाना लाङो।	1. थै रोदाया गुबुन गुबुन बिदाम आरो आंगोफोरनिफ्राय थै रोगानानै लाबोना मैखुननो ज ‘गायफैयो।
2. धमनिनि इनजुरा रोजा आरो गुरै।	2. थै रोदाफोरनि इनजुरा गोबा।
3. क्लम’ धमनिनि अनगायै गासैबो धमनिआ गोगो थै रोगायो।	3. क्ल ‘म थै रोदानि अनगा गासैबोथै रोदाया गोगो नङै थै रोगायो।
4. धमनिआव जेबो भाल्भ थाया।	4. थै रोदाफोरा भाल्भ गोनां जायनि जाहोनाव थैआ मोनसेल’ दिगजों बोहैयो।

सों 12. थै नारथाया मा ? बबे थै नालायाव थै नारथाइया बांसिन? 

फिन : थै नालानि इनजुराव थैआ होनाय नारथाइ बोलोखौ थै नारथाइ बुङो। धमनिफोराव थै नारथाइया बांसिन।

सों 13. थनथ्र ‘नाय नारथाइ आरो गोसारथि नारथाइआ मा? बेफोरखौ माबोरै फोरमायो?

फिन : धमनिनि सिंआव इसिंआरि थनथ्रनाय समाव जानाय नारथाइखौ थनथ्रनाय (systole) नारथाइ बुङो। 

धमनिनि सिंआव इसिंआरि गोसारनाय समाव जानाय नारथाइखौ गोसारथि (diastolic) नारथाइ बुङो।

बेखौ systolic pressure/diastolic pressure हिसाबै फोरमायो। सरासनस्रा सिष्टलिक नारथाइया पारानि 120mm आरो डांइस्टलिक नारथाइया पारानि 80mm बेखौ 120/80 लिरो।

सों 14. गोजौ थै नारथाइया मा? बेनि जाहोनाव मा जानो हागौ?

फिन : धमनिफोराव थैनि सरासनस्रा नारथाइनिख्रुइ बांसिन नारथाइ जाखांनायखौनो गोजौ थै नारथाइ एबा हाइपारटेनसन बुङो।

गोजौ नारथाइया धमनिफोरनि जेददों जानायाव जायो जाउनाव थै बोहैनायनि हेंथा फैयो। बेयो धमनिखौ जिहोनो हागौ आरो इसिंआरि थै गोहोनो हागौ। 

 सों 15. प्लेटेलेटसनि खामानिआ मा?

फिन : प्लेटेलेटसनि गाहाय मख ‘जाथाव हाबाया जाबाय थै दैदेनग्राफोरनिफ्राय जानाय थै गनायखौ लाथा खाना थाबथा होनाय। 

सों 16. लसिकाया मा? लसिकानि खामानिआ मा?

फिन : लसिकाया जाबाय थै खानाय रोदानिफ्राय ओंखारबोनाय थैआव थानाय प्लाजमानि मोनसे बाहागो।

लसिकाया दोगोन जानाय आरो सोबखांजानाय मेजेमखौ बिबुसानि रोगायो आरो जिबख्रिआरि आलादा रोसिफोरखौ फिन थैसिम बोहैखारहोयो।

सों 17. लाइफां बिलाइसिम दै रोगाना लांग्रा गुबुन गुबुन जिबख्रिफोरनि मुं लिर। 

फिन : लाइफांआ रोदायाव थानाय जाइलेम बिदामनि जोहै बिलाइसिम दै रोगाना लाङो। जाइलेम बिदामाव ट्रेकाइड आरो नालासा एबा ट्रेकिया जिबख्रि थायो जायनि जोहै दै रोगाना लाङो।

सों 18. लाइफांनि बिथिंआव (i) दै आरो खनि संख्रि (ii) आदार फोरा माबोरै दैदेनजायो बेखेव।

फिन : (i) दै आरो खनि संख्रि दैदेननाय : दै आरो खनि संख्रिआ गलिनानै थायो। लाइफांनि रोदाया बे गलिथाइखौ सोबनानै लायो आरो ट्रेकाइड आरो नालासा जिबख्रिनि जोहै गोजौनि बिलाइसिम दैदेनलाङो। ट्रेकाइड आरो नालासाफोरा जाइलेम बिदामनि जिबख्रिफोर। दै आरो खनि संख्रिआ फारियै मोनसे ट्रेकाइडनिफ्राय गुबुन मोनसे ट्रेकाइडसिम बोहैलाडङो।

(ii) आदार दैदेननाय : लाइफां बिलाइया ग्लुकज बाइदि आदारखौ बानायो। बे बानायनाय आदारखौ लाइफांनि मोनसे बाहागोनिफ्राय गुबुन मोनसे बाहागोसिम फ्लवेम बिदामनि जोहै दैदेनो। आदारआ दैलाव थासारिआव दैदेनजायो।

सों 19. जामुं दोरोदहोनायआ मा? बेयो लाइफांआव माबोरै जायो?

फिन : सोरां बिजिरख दानायाव सोमजिनाय जामुंफोरा गलिनाय थासारिआव लाइफांनि गुबुन गुबुन बाहागोसिम रोगाना लांजायो। बेखौनो दोरोद होनाय एबा जायगा सोलायनाय बुङो।

बेयो फ्लवेम मुंनि दैदेनग्रा बिदामनि बाहागोआव जायो। गोजौ फारसे आरो गाहाय फारसे थानाय नांजाब लोगो जिबख्रिनि हेफाजाबाव सानद्रि नालाफोराव आदार आरो गुबुन मुवाफोरनि जायगा सोलायनाया जायो।

सों 20. दैआ माबोरै गोजौ दंफांआव गोजौ फारसे दावखोयो?

फिन : दै खफ एंगारनाय बिखान्थिआनो दंफांनि गोजौ फारसे दै दावखो होनायनि मोनसे गाहाय बिबान लायो। साननि समाव जेब्ला स्ट’माटाया गेवना थायो अब्ला दै खफ’ एंगारनाय बोगथाबनाया जाइलेमाव दैनि खारथाइखौ सोलि होनायनि गाहाय बोलो जायो।

सों ना य फरा बिजाबनि Page No. 110

सों 1. मानसिनि रोगाथाइ बिखान्थिनि दाफुंग्राया मा मा? बेफोर दाफुंग्रानि हाबाफोरा मा मा?

फिन : मानसिनि रोगाथाइ बिखान्थिनि दाफुंग्राफोरा मैखुन, थै आरो थै नालाफोर। मैखुन : मैखुना मोनसे मोदोम गेहेनारि अंग। बेयो सोलेरनि गासै अक्सिजेन गोयै थैखौ आजावना समफ्लसिम पाम्प खालामना हगारहरो। समफ्लआव थैआ गोथार जाना अक्सिजेन सोबना लायो आरो बे अक्सिजेन गोनां थैआ मैखुनसिम थाङो उनाव मैखुननि पाम्प जानाय एबा थनथ्र ‘नायनि थाखाय अक्सिजेन गोनां थैआ सोलेरनि गुबुन गुबुन जिबख्रिआव थाङो।

थै : थैआ रोखोमसे दाजाबग्रा बिदाम। थैनि गुबुन गुबुन थाफादेरफोरा गुबुन गुबुन खामानि मावो। थैनि गोजा थै सेरेफ, गुफुर थै सेरेफ आरो प्लेटिलेटसफोरा आदार, खनि संख्रि, नाङै मुवाफोर, CO₂, O₂ रोगानायनि अनगायैबो सोलेराव हाबनाय जिउसा बुथारनाय आरो थै गनायखौ बन्द खालामनाय बायदि गोबां खामानि मावो। 

थै नाला : थै नालाफोरा माखासे रोदा दालाय आरो खानाय रोदा जे बादि जाना सोलेरनि जिबख्रियाव हाबना थायो जाहाते गासै जिबख्रिसिम थैआ गोसारनो हायो।

सों 2. आहार सोबग्रा जिउआरि आरो दाउफोरनि अक्सिजेन गोनां आरो अक्सिजेन गैयि थैखौ आलादा खालामनो गोनां जायो मानो? 

फिन : अक्सिजेन गोनां आरो अक्सिजेन गोयै थैखौ आलादा खालामनाया सोलेराव थोजासे अक्सिजेन मोननायाव मोजां हेफाजाब खालामो। आहार सोबग्रा जिउआरि आरो दावफोरनो अराय सम अक्सिजेननि गोनां जायो।

सों 3. गोजौयै दाफुंजानाय लाइफांफोरनि रोगाथाइ बिखान्थिनि दाफुंग्राया मा मा? 

फिन : गोजौयै दाफुंजानाय लाइफांफोरनि रोगाथाइ बिखान्थिनि दाफुंग्राया जाइलेम आरो फ्ल ‘येम।

सों 4. लाइफाङाव दै आरो खनियारि मुवाफोरा माबोरै रोगाजायो? 

फिन : दै आरो गलिनाय खनि संख्रिफोरा जाइलेम बिदामनि जोहै दैदेनजायो। जाइलेम बिदामाव लाइफांनि गासैबो बाहागोआव स ‘हैनाय बादि आन्थोर जयि दै दैदेनग्रा नाला दानो थाखाय रोदा, बिथ’ आरो बिलाइनि दैदेनग्रा नाला आरो हां नालाफोरा इसिंआरि फोनांदेरनाय। रोदाफोराव हाजों नांजाबनाय जिबख्रिफोरा सांग्राङै आयन आजावो। बेयो रोदा आरो हानि गेजेराव बेफोर आयननि थुब्रायनायनि मोनसे फाराग सोमजिहोयो। बेनिखायनो बे फारागथिखौ गैया खालामनो थाखाय हानिफ्राय रोदासिम दै थाङो। बेयो रोदा जाइलेमाव दैनि दोम खारथाय थानायखौ फोरमायो जाय दैनि मोनसे थोंलारि सोमजि होनानै दोमयै गोजौ मोखां फारसे नारखो हरो।

सों 5. लाइफाङाव आदारा माबोरै रोगाजायो? 

फिन : लाइफांआ सोरां बिजिरख ‘आव सोमजिनाय आदारफोरखौ फ्लयेमनि जोहै लाइफांनि गुबुन गुबुन आंगोफोराव दैदेनो। फ्लयेमआ सोरां बिजिरख दानायाव सोमजिनाय मुवाफोरनि अनगायैबो एमिन’ एसिड आरो गुबुन मुवाफोरखौबो रोगायो। बेफोर मुवाफोरा जुनियायै रोदा, फिथाइ आरो बेगर आरो बारायग्रा अंगफोरसिम दैथाय हरजायो। गोजौ फारसे आरो गाहाय फारसे थानाय नांजाब लोगो जिबख्रिनि हेफाजाबाव सानद्रि नालाफोराव आदार आरो गुबुन गुबुन मुवाफोरनि जायगा सोलायनाया जायो।

फ्लयेमनि जायगा सोलायहोनाया शक्टि बाहायनानै मावफुंजायो। एटिपिनिफ्राय शक्टि बाहायना फ्लवेम बिदामनि सुक्रज मुवाफोरा जानगार होजायो। बेयो बिदामनि सेरमायारि नारथाइखौ बांहोनानै बेसिम दैखौ थांहोयो। बे नारथाइया फ्लयेमाव थानाय मुवाफोरखौ खम नारथाइ गोनां बिदामसिम थांहोयो। लाइफांनि गोनांथि बादियै फ्लयेमआ मुवाफोरखौ थांनो होयो।

6.5 खिगारनाय एबा सिगारनाय 

Additional Questions

सों 1. सिगारनाया माखौ बुङो?

फिन : सोलेरनि गुबुन गुबुन जिब रासायनारि जाथाइनि मावथाइफोराव सोमजिनाय नाइट्र ‘जेन हारिनि मुवाफोरखौ बोखानायाव नांफादेरनाय जिबियारि बिखान्थिखौ सिगारनाय बुङो।

सों 2. मानसिनि सिगारनाय बिखान्थिनि गाहाय बाहागोफोरा मा मा?

फिन : मानसिनि सिगारनाय बिखान्थिनि गाहाय बाहागोफोरा जरासे गिला, जरासे हासुदै नाला, मोनसे सिथोब आरो हासुदै लामा। 

सों 3. गिलानि नेफ्रनआ मावनाय मोननै गोनां खामानि मख’। 

फिन : नेफ्रनआ मावनाय मोननै खामानि :

(i) सरनाय : नेफ्रननि ग्लमेरुलासआव मोनसे नारथाइजों थैनि फ्लाजमाया सरजायो। सरनायाव माखासे मुवाफोर जेरै–ग्लुकज, एमिन’ एसिड, संख्रि आरो बुरजा दैफोरा

ब ‘मेननि केपसुलाव जमा जायो। 

(ii) सोबखांनाय : बमेननि केपसुलनि फ्राय बै सरजानाय मुवाफोरा नेफ्रननि गोलाव नालाजों बारलाङो। बै समाव बैफोर मुवाया सायख’नाय गोहोजों सोबखांफिनजायो।

सों 4. गिलानि मोननै गाहाय खामानिखौ लिर।

फिन : गिलानि मोननै गाहाय खामानिआ जाबाय : 

(i) गिलाया देहानि नाङै बिस गोनां मुवाफोरखौ दहानिफ्राय सिगारो।

(ii) गिलाया दैनि जखाखौ सामलायो आरो खनिआरि आयनखौ गोरोब जखायै लाखियो। 

सों 5. गिलानि फेलें जानायाव मा जानो हागौ?

फिन : गिलाया गाज्रि जायोब्ला देहायाव माखासे बिसगोनां नाइट्रजेनआरि मुवाफोरा जमा जानाय जाहोनाव मानसिआ थैनोबो हागौ।

सों 6. डायेलाइचिचआ मा?

फिन : डायेलाइचिचआ जाबाय मोनसे गुबै नङि गिला (Artificial kidney) बाहायना थैनिफ्राय नाइट्रजेन हारिनि दिहुनजा मुवाखौ बोखारनाय मोनसे सोलो।

सों 7. गुबै नङिगिलाया मा? बेयो माबोरै खामानि मावो?

फिन : गुबै नङिगिलाफोरा खावस्लिं सोरखिग्रा बाहागो गोनां माखासे नालाफोरजों दाजानाय जाय डायेलाइचिच खालामग्रा बिलावजों आबुं गंसे आइजेंआव गोजावना थायो। नाइट्रजेन गोनां गाज्रि मुवा गैयि खालामनाय अनगायैबो बे बिलावहा थैनि बादि सेरमायारि नारथाइ दें।

खामानि मावथाइ : बेरामि मानसिनि थैआ डायलाइचिच खालामग्रा नालानि गेजेरजों थाङो। बे लामाजों थानाय समाव थैनिफ्राय नाङि मुवाफोरा गोसारनायजों डायेलाइचिच खालामग्रा बिलावआव हाबहैयो। सोदांनाय थैखौ ज ‘ब्रानिसिम साखोनायजों सोहरफिननाय जायो। बेयो गिलानि खामानिजों एखेब्लाबो सोबखांफिननाय जाया।

सो 8. गुबै नङिगिलानि मोनसे खामानि लिर। 

फिन : गुबै नङि गिलाया डायलाइचिचनि जोहै नाइट्रजेन हारिनि नाङै मुवा जेरै इउरियाफोरखौ बोखारो।

सों 9. लाइफांआ नाङैमुवाफोरखौ मा मा सोलोयै खिगारो?

फिन : लाइफांआ नाङै मुवाफोरखौ गाहायै बिलाइ, बिथ’ बाइदिजों सिगारो। बिलाइनि जोहै O₂ CO₂ एबा बांद्राय दै फोरखौ खिगारो। खायसेआव नाङि बेसादफोरा जिबख्रि लांदां थावनिफोराव आथा आरो धुना हिसाबै दोनथुम जानो हागौ। बेफोर माबेबा सिरिनाय बिलाइजों एंगारजायो एबा सोरगिदिं हायाव खिगारनो हागौ।

सोंनाय फरा बिजाबनि Page No. 112

सों 1. नेफ्रननि दाथाइ आरो खामानिखौ फोरमाय।

फिन : नेफ्रननि दाथाइ : नेफ्रननि फारसे खर’ आ बुथुमग्रा नालासाजों नांजाबनाय मोनसे गोलाव नालाजों दाजानाय आरो गुबुन फारसे खर’ आ काप महरनि दाथायारि । बे काप महरनि दाथाइखौ ब ‘मेननि केपसुल बुङो। बे केपसुलाव थै नालासानि थुब्रा थायो जायखौ ग्ल ‘मेरुलास बुङो। थैआ ग्ल ‘मेरुलासनि गेजेरजों हाबो।

नेफ्रननि खामानि : थैआ ब ‘मेननि केपसुलआव ग्ल ‘मेरुलासनि जोहै फसरजायो। फसरजानाय मुवाफोरा गोलाव नालानि गेजेरजों थाङो। फसरजानाय माखासे मुवाफोर जेरै– ग्लुकज, एमिन’ एसिड, संख्रि, दै बायदिआ गोलाव नालानि सोरगिदिं थानाय थै खानाय रोदाफोरजों सोबखां फिनजायो। सोबखांनाय उनाव थालांनाय नाङै मुवा जेरै इउरिया, इउरिक एसिड बांद्राय संख्रि, दैफोरा बुथुमग्रा नालासानि गेजेरजों थांना हासुदै बिथोबआव जमा जाहैयो।

सों 2. दिहुनजा मुवाफोरखौ एंगारहरनो लाइफङा सिगारनायाव बाहायनाय आदबफोरा मा मा?

फिन : लाइफांआ दिहुनजा मुवाफोरखौ एंगारहरनो बाहायनाय आदबफोर : 

(i) दिहुनजा मुवाफोरखौ जिबख्रिनि लांदां जायगायाव दोनथुमनाय।

(ii) बिलाइया सिरिनायाव नाङैमुवाफोरा थांफानाय बादि बिलाइयाव दोनथुमनाय। 

(iii) रेजिन, गाम बाइदिफोरखौ गोथै जाइलेम एबा बिगुराव दोनथुमनाय।

(iv) लाइफांफोरा नाङि बेसादखौ सोरगिदिं हायावबो सिगारो। 

सों 3. हासुदै सोमजिनाय बिबांखौ माबोरै सामलायनाय जायो?

फिन : हासुदै सोमजिनाय बिबांआ दै सोबखांफिननायनि सायाव सोनारो। सोलेराव बांद्राय दै थायोब्ला दैलाव हासुदै सिगारो आरो दैनि बिबाङा खम जायोब्ला गोसाथि हासुदै सिगारो। सोलेराव बांद्राय नाङै मुवा थायोब्लाबो बेफोरखौ सिगारनो बांसिन दै नांगौ जायो। बेखायनो हासुदै सोमजिनाय बिबाङा बाङो।

सोंथि बिदां

सों 1. मानसिनि गिलाया मोनसे बिखान्थिनि आंगो–

(a) सुफुंसारनाय।

(b) हां लानाय।

(c) खिगारनाय।

(d) दैखफ एंगारनाय।

फिन : (a) सुफुंसारनाय।

सों 2. लाइफांफोरनि जाइलेमनि बिबाना–

(a) दै रोगानाय।

(b) आदार रोगानाय।

(c) एमिन’ एसिद रोगानाय।

(d) अक्सिजेन रोगानाय।

फिन : (a) दै रोगानाय।

सों 3. गावनो सुफुंसारनायाव नांगौ जायो– 

(a) कार्बन डाइअक्साइड आरो दै।

(b) क्लर ‘फिल।

(c) साननि सोरां।

(d) गोजौनि गासैबो।

फिन : (d) गोजौनि गासैबो। 

सों 4. कार्बन डाइअक्साइड, दै आरो शाक्ति सोमजिहोनो पाइरु भेट बायफ्लेहोनाया जायो– 

(a) जिबख्रिनरन्दैयाव।

(b) माइट ‘कण्ड्रियायाव।

(c) क्लर ‘प्लाष्टआव।

(d) जिबख्रिमिरुआव

फिन : (b) माइट ‘कण्ड्रियायाव।

सों 5. जोंनि सोलेराव मेजेमा माबोरै दोगोन जायो? बे बिखान्थिया बबेयाव जायो?

फिन : सोलेराव मेजेमनि दोगोना बिबुसायाव जायो। बिबुसायाव सफैनाय मेजेमफोरा लादुरा महरनि जायनि थाखाय एनजाइमा बेसोरनि सायाव जाथाइ खालामनो गोब्राब जायो। बिख्लो संख्रिआ एनजाइमनि जाथाइनि उदायथिखौ बांहोनो लादुराफोरखौ फिसा फिसा महराव बायस्राहोयो।

बिख्लो रोसिआव थानाय लाइपेज मुंनि एनजाइमा बे फिसा फिसा मेजेमखौ दोगोन खालामना मेजेमारि एसिड आरो ग्लिसारलाव सोलाय होयो।

सों 6. आदार दोगोन जानायाव खुदैनि बिफावआ मा?

फिन : आदार दोगोन जानायाव खुदैनि बिफाव :

(i) खुदै आव थानाय खुदैयारि एमाइलेजआ जेथोगोनां गुन्द्रामानि फुरजा मुवाखौ सिफायनानै सिनि सोमजिहोयो। 

(ii) खुदैआ आदारखौ फिसिनानै फिस्ला आरो गोरलैयै दोगोन जानो हानायबादि गुन्दै खालामो। 

सों 7. गाव सुफुंसारनायनि थाखाय गोनां थामिनफोरा मा मा? आरो बेनि दिहुनजा बेसादफोरा मा मा?

फिन : गाव सुफुंसारनायनि गोनां थामिनफोरा जाबाय :

(i) जिबिनि जिबख्रिआव क्लर ‘फिल थानाय।

(ii) गोथां बाहागो एबा जिबख्रिफोराव दै रोगानो हानाय राहा मोनां। 

(iii) सोरां बिजिरख’ दानो हानाय बादि सान शक्टि मोननो हानाय। 

(iv) कार्बहाइड्रेड बाइदि आदार सोमजिहोनो थोजासे कार्बनडाइ अक्साइड मोननाय।

सों 8. बारजिबि आरो बारनाङिजिबि हां लानायनि गेजेराव मा मा फाराग दं? बारनाङिजिबि हां लाग्रा माखासे जिबफोरनि मं लिर। 

फिन : फाराख :

(i) बारजिबि हांलानायाव उदां अक्सिजेन नांगौ जायो नाथाय बारनाङै जिबिआव उदां अक्सिजेननि गोनां जाया।

(ii) बारजिबि हांलानायाव CO₂ दै आरो गोबां शक्टि सोमजिहोना ग्लुकजनि फुरा अक्सिजाबनाय जायो नाथाइ बार नाडै जिबिआव ग्लुकजआ खावस्लिङै अक्सिजाबना इसे बिबांनि शक्टि होना CO₂ गेस आरो एलकहल सोमजियो। 

बारनाङि जिबि हां लाग्रा जिबफोरा जाबाय इष्ट, बेक्टेरिया, एमिबा, एसकारिस बाइदि बाइदि। 

सों 9. बारम ‘नाय गेसनि सोलायसोल ‘खौ बांहोनो मोबादि महर लायो?

फिन : बार मना (alveoli) फोरा गोबा इनजुर गोनां आरो थै नालासाफोरनि गोबां जेखनथाइ थायो। 

बारमनाया बेलुनबादि महरनि। बेवहाय गेसनि सोलाय–सोल’ खालामनो हानाय थाखाय थोजासे सा बिखुं थायो।

सों 10. जोंनि सोलेराव हिम ‘ग्लबिननि आंखाल जायोब्ला मा जानो हागौ? 

फिन : थैआव हिम ‘ग्लबिननि आंखाल जायोब्ला O₂ दैदेननायनि हाथिया खमिलाङो। बेखायनो अक्सिजेननि आंखाल जानाय बेरामफोर जेरै– हांलानो हायै, आयरननि आंखाल, एनिमिया बाइदि जायो।

सों 11. मानसिनि नै–खारसारदिंनायखौ बेखेव। बेयो मानो गोनां? 

फिन : नै खारसारथिंनाय : मानसिनि बिथिंआव मोनफ्रोम गिदिंखननि समाव मैखुननि गेजेरजों थैआ खेबनै थाङो। बेखौनो नै खारसारदिंनाय बुङो। नै खारसारदिंनायाव दं– 

(i) सिस्टेमिक गिदिंखन (systemic circulation)

(ii) क्लम’ धमनि गिदिंखन (Pulmonary circulation)

(i) सिस्टेमिक गिदिंखन :- अक्सिजेन गोनां थैआ आगसि अखंनिफ्राय आगसि इसिंसिम धानाय उनाव सोलेरनि गुबुन गुबुन आंगोफोराव साखो जायो । अक्सिजेन गोयै थैआ सोलेरनि गुबुन गुबुन बाहागोनिफ्राय फैना गोजौ गेदेर रोदानि जोहै आगदा अखंआव हाबो। आगदा अखंनिफ्राय आगदा इसिंआव हाबनाय उनाव मैखुननि साखोनाय जाहोनाव बे थैआ समफ्लसिम मोनहैयो। 

(ii) क्ल ‘म धमनिनि गिदिंखन :- आगदा इसिंनिफ्राय अक्सिजेन गैयै थैआ क्लम धमनिनि जोहै समफ्लआव थांना अक्सिजेन अरजाबो। बे थैआ मैखुननि आगसि अखंआव फैयो उनाव आगसि इसिंआव फैयो। आगसि इसिंआ बे थैखौ गेदेर धमनिसिम सिस्टेमिक गिदिंखननि थाखाय साखोहरो।

नै गिदिंखननि गोनांथि :- मानसिनि मैखुन आगदा आगसि बाहागो खालामनाय ‘अक्सिजेन गोनां आरो अक्सिजेन गोयै थैखौ गलाइ मोनदेर जानायनिफ्राय रैखा खालामो। बे बादि जानाया सोलेरनो थोजासे अक्सिजेन जागायनो हायो आरो सोलेरनि बिदंखौ थियै सामलायनो हायो।

सों 12. जाइलेम आरो फ्लयेमाव मुवाफोरनि रोगाथाइनि गेजेराव मा मा फाराग दं?

फिन :

जाइलेम	फ्लयेम
1. जाइलेमा दै आरो खनि संख्रिखौ रोदाजों सोबना लाइफांनि गुबुन गुबुन बाहागोसिम लाङो।  2. जाइलेमाव दैदेननाया नाला आरोनालासा फोरजों जायो।  3. जाइले मनि दैदेननाय एबा रोगानायखौ गोरलै महरारि बोलो होनना बुंजायो।	1. फ्लयेमआ बिलाइजों बानायनाय आदारखौ रोगाना लाइफांनि गुबुन गुबुन बाहागोसिम लाङो। 2. फ्लयेमाव दैदेननाया नांजाब लोगो जिबख्रिनि हेफाजाबाव सानद्रिनालानि जोहै जायो।  3. फ्लयेमनि रोगानाया शक्टि बाहायनामावफुंजायो।

सों 13. समफ्ल ‘नि बारम ‘ना आरो गिलानि नेफ्रनफोरनि दाथाइ आरो खामानिनि सोमोन्दो लाखिनानै बेसोरनि खामानिखौ रुजु।

फिन :

बारम ‘ना	नेफ्रन
बारम ‘नाया गोबा इनजुरजों दाजानाय मोनसे बेलुन महरनि। बारम ‘नाया गोबां इनजुर गोनां थै नालासानि जेखन जायजों गेस सोलाय सोल’ जायो। बारम ‘नाया CO₂ आरो O₂ गोसारनो थाखाय महरा बांलांनो हायो। बारम ‘नाया समफ्लआवल गेस सोलायसोल’ खालामो।	नेफ्रनआ गोबा इनजुरजों दाजानाय माखासे नालासा थुब्रा गोनां मोनसे काप महरनि।बमेननि केपसुलआ जेराव माखासे थै नालासा थुब्रा थायो जायखौ ग्लेमरुलास बुङो, बियो फसरनाय खामानि मावो। फसरजानाय मुवाया गिलायारि नालासाजों।थांना फिन सोबखांजायो। माखासे नाङै  मुवाफोरा लाव लाव अबस्थायाव बे नालासाजोंनो सिगारजायो।

MULTIPLE CHOICE QUESTIONS

सों 1. सोरां बिजिरथिनि गिबि थोरफोआ–

(क) दैनि गुन्द्रामा बायस्राहोनाय।

(ख) रोखोमसे गोहो सोमजिनाय।

(ग) क्लर ‘फिलनि सांग्रां जानाय। 

(घ) ATP बिजिरनाय।

फिन : (ग) क्लर ‘फिलनि सांग्रां जानाय। 

सों 2. गाहायनि माबे जिबआ थोंजोङै बारमण्डलनि अक्सिजेनखौ देहा जिबख्रियाव जगायनो हानाय बिखान्थि थायो–

(क) एम्फौ। 

(ख) ना। 

(ग) मानसि। 

(घ) एम्बु।

फिन : (क) एम्फौ। 

सों 3. दोगोन नालानि बबे बाहागोआव दोगोन जानाय आदारा सोबखांजायो? 

(क) बान्दार। 

(ख) एपेन्दिक्स। 

(ग) बिबु गेदेर।

(घ) बिबुसा।

फिन : (घ) बिबुसा।

सों 4. खुदैआव थानाय एनजाइमनि मुङा–

(क) एमाइलेज। 

(ख) लाइपेज। 

(ग) पेपसिन। 

(घ) त्रिपसिन।

फिन : (क) एमाइलेज। 

सों 5. ग्लुकज बायस्रानायनि गिबि खोन्दोआ जायो–

(क) निउक्लियासआव।

(ख) माइट ‘कनड्रियायाव।

(ग) साइटप्लाजमाव।

(घ) लाइसजमआव।

फिन : (ग) साइटप्लाजमाव।

सों 6. एम्फौ जाग्रा लाइफांआ एम्फौ हमनानै–

(क) कार्बहाइड्रेट सोबो।

(ख) प्रटिन सोबो। 

(ग) एमिन’ एसिड सोबो। 

(घ) मेजेम मुवा जायो।

फिन : (ख) प्रटिन सोबो। 

सों 7. बान्दार बिथोबनिफ्राय ओंखारनाय प्रटिन दोगोन खालामग्रा एनजाइमनि मुङा–

(क) HCI.

(ख) पेपसिन।

(ग) रेनिन।

(घ) एमाइलेज।

फिन : (ख) पेपसिन।

सों 8. सोरां बिजिरख ‘नायाव क्लर ‘फिलनि खामानिया जाबाय :

(क) इलेकट्रन आजावनाय।

(ख) इलेकटून होनाय।

(ग) दै गावस्राहोनाय।

(घ) कार्बहाइड्रेट बिजिरख ‘नाय।

फिन : (क) इलेकट्रन आजावनाय।

सों 9. सिष्टेमिक धमनिजों मानसिनि मैखुननि बबे खथानिफ्राय थैया बाहेराव ओंखारलाडो?

(क) आगदा अखं।

(ख) आगदा इसिं।

(ग) आगसि अखं।

(घ) आगसि इसिं।

फिन : (घ) आगसि इसिं।

सों 10. मानसिनि मैखुननि बबे मोनसे खथायाव गोथार नङिथै थायो?

(क) आगदा अखं।

(ख) आगदा इसिं।

(ग) आगसि अखं।

(घ) आगसि इसिं।

फिन : (क) आगदा अखं।

Chapter No.	CONTENTS
खोन्दो – 1	रासायनारि फिनजाथाइ आरो समानथाइ
खोन्दो – 2	एसिद, खारदै आरो संखि
खोन्दो – 3	धातु आरो धातुनडिफोर
खोन्दो – 4	कार्बन आरो बेनि खौसेमुवाफोर
खोन्दो – 5	गुदि मुवाफोरनि आन्थोरारि थाखोराननाय
खोन्दो – 6	जिउ बिखान्थि
खोन्दो – 7	सामलायनाय आरो लोब्बा लाखिनाय
खोन्दो – 8	जिबफोरा माबोरै आजायो
खोन्दो – 9	फोलेरफारि आरो फारि जौगानाय
खोन्दो – 10	सोरां-रिफिनाय आरो रिफिख ‘ननाय
खोन्दो – 11	मानसिनि मेगन आरो रंगिना-संगिना बुहुम
खोन्दो – 12	मोब्लिब गोहो
खोन्दो – 13	मोब्लिब दाहारनि सुम्बकारि गोहोम
खोन्दो – 14	शक्टिनि फुंखाफोर
खोन्दो – 15	जोंनि आबहावा
खोन्दो – 16	मिथिंगायारि सम्पदनि सामलायनाय

SEBA Class 10 Science Question Answer In Bodo Chapter 6 जिउ बिखान्थि | Life Processes | Class 10 Science Question Answer in Bodo As Per New Syllabus दिए गए हैं ताकि आप आसानी से विभिन्न अध्यायों के माध्यम से खोज कर सकें और जरूरतों का चयन कर सकें Notes of SEBA Class 10 Science Question Answer In Bodo Chapter 6 Question Answer. Class 10 Science Question Answer Chapter 6 in Bodo. SEBA Class 10 Science Question Answer In Bodo Medium Chapter 6 covers all the exercise questions in NCERT, SCERT.

SEBA Class 10 Science Question Answer In Bodo Chapter 6 in Bodo Medium | Bodomedium Class 10 General Science notes इस पोस्ट में हम आपको ये समझा ने कि कोशिश की है की Bodo Medium Class 10 Science Question answer | SEBA Class 10 Science Question Answer In Bodo Chapter 6 अगर आप एक bodo सात्र या शिक्षाक हो तो आपके लिए लावदयक हो सकता है।

Note- यदि आपको इस Chapter मे कुछ भी गलतीया मिले तो हामे बताये या खुद सुधार कर पढे धन्यवाद।